سابق وزیراعظم عمران خان کی جانب سے توشہ خانے سے فروخت کی گئی گھڑی خریدنے کے دعویداردبئی میں مقیم پاکستانی تاجر عمر فاروق ظہور کی سابقہ اہلیہ اداکارہ صوفیہ مرزا نے دعویٰ کیاہے کہ مطلوب مجرم عمر فاروق ظہور سے جان کا شدید خطرہ ہے ۔

توشہ خانہ اسکینڈل میں حالیہ پیش رفت کے نتیجے میں عمر فاروق ظہور کے منظر عام پر آ نے کے بعد اداکارہ صوفیہ مرزا نے اپنی جان کے حوالے سے سنگین خدشات کا اظہار کیا ہے۔

اداکارہ نے اپنے ٹوئٹ میں لکھا کہ مجھے مطلوب مجرم عمر فاروق ظہور سے جان کا شدید خطرہ ہے جس نے 12 سال قبل صدف اور زبیر کی جعلی ولدیت پر میرے بچوں کو اغوا کرکے اسمگل کیا تھا۔

اداکارہ نے مزید کہا کہ میرے خلاف بوگس ایف آئی آر درج کی جارہی ہیں، میرے خلاف تمام جھوٹے مقدمات اور خبریں مجھے میرے بچوں سے محروم کرنے کے لیے چلائی گئی ہیں۔

اداکارہ صوفیہ مرزا نے اپنے سابق شوہر عمر فاروق ظہور کے خلاف اپنی بیٹیوں کو اغوا کرکے جعلی والدین کے ذریعے دبئی اسمگل کرنے کا مقدمہ دائر کررکھا ہے۔

سپریم کورٹ ملزم عمر فاروق ظہور کو اشتہاری قرار دیکر انٹرپول سے ان کے ریڈ وارنٹ جاری کرواچکی ہے۔