جنگ گروپ سے واپستہ سینئیر صحافی مدثر مرزا 70 سال کی عمر میں حرکتِ قلب بند ہونے سے انتقال کر گئے۔

روزنامہ جنگ کے مطابق مدثر مرزا گزشتہ رات گھر گئے، آپ کراچی میں تنہا رہ رہے تھے، جبکہ اہلِ خانہ اسلام آباد گئے ہوئے تھے۔

اطلاع کے مطابق گھر والوں کے مسلسل رابطہ کرنے کے باوجود فون کا جواب نہیں دیا گیا تو پڑوسیوں نے گھر میں داخل ہو کر کمرے کا دروازہ توڑا، تاہم وہ حیات نہیں تھے۔

جنگ نے بتایا کہ مدثر مرزا کے بیٹے واثق کے مطابق والد صاحب فون نہیں اٹھا رہے تھے، میرے کہنے پر پڑوسی مرکزی دروازے سے گھر کے اندر گئے لیکن گھر اندر سے بھی بند تھا۔

مدثر مرزا کے پڑوسی اسماعیل کا کہنا ہے کہ واثق نے فون پر کہا دروازہ توڑ دیں لیکن میں نے چابی والے کو لاکر گھر کھولا تو مدثر مرزا اپنے بیڈ پر تھے، انہوں نے چشمہ پہنا ہوا تھا اور موبائل سینے پر رکھا ہوا تھا۔

پڑوسی کا کہنا تھا کہ ہم مدثر مرزا کو فوری طور گلشن اقبال کے نجی اسپتال لے کر گئے جہاں ڈاکٹرز نے ان کی موت کی تصدیق کی، ڈاکٹرز کے مطابق مدثر مرزا کو انتقال کیے 10 سے 12 گھنٹے گزر چکے تھے۔

مرحوم مدثر مرزا کی میت سرد خانے میں موجود ہے، بیٹے، بہو اور اہلیہ کے کراچی آںے کے بعد اب کی نماز جنازہ اور تدفین کا اعلان کیا جائے گا۔

مدثر مرزا 5 اپریل 1952 میں پیدا ہوئے، وہ چیئرمین ایڈیٹوریل کمیٹی کے ساتھ ساتھ روزنامہ جنگ کے ڈپٹی ایڈیٹر کے طور پر بھی فرائض سر انجام دے رہے تھے۔