پنجاب کے شہرساہیوال میں مردم شماری کیلئے جانے والے عملے کو ہراساں کرنے اورتشدد کا نشانہ بنانے والوں کوگرفتار کرکے مقدمہ درج کرلیا گیا ۔

مردم شماری کے عملے کی جانب سے پوچھے جانیوالے سوالات پر شہریوں اورعملے کے درمیان تلخ کلامی بڑھ کر لڑائی جھگڑے تک پہنچ گئی تھی۔

مردم شماری کی ڈیوٹی پر تعینات اہلکار وحید عالم ولد نے 15 پر اطلاع دی کہ 80/5R ساہیوال میں مردم شماری کے دوران 5 سے 6 افراد نے ان پر ڈنڈوں سے حملہ کردیا، اور وہ اپنے ساتھ ڈیوٹی پر مامور کانسٹیبل محمد افتخار کے ساتھ بڑی مشکل سے جان بچا کر بھاگا ہے۔

مردم شماری عملے کی درخواست پر مرزا محمد عمران عرف مانی، شہبازعرف باز اور مقصودعرف کالی سمیت 3 سے 4 خواتین کے خلاف تھانہ فتح شیر میں مقدمہ درج کرکے ملزمان کو گرفتار کرلیا گیا۔

پولیس نے ہراساں کرنے والے ملزمان کو جوڈیشل ریمانڈ کے لیے عدالت میں پیش کردیا ہے۔