کینیڈا کے جنگلات میں لگی آگ پر قابو پانے کی کوششیں جاری ہیں جس کی وجہ امریکا کوشدید مشکلات کا سامنا ہے، آگ بجھانے میں 600 سے زائد امریکی فائر فائٹرز بھی حصہ لے رہے ہیں۔

امریکا میں ہوا کا معیار بدترین سطح پر پہنچ گیا ہے، نیویارک، نیو انگلینڈ، ساؤتھ کیرولائنا، اوہائیو، انڈیانا اور مشی گن سمیت کئی ریاستوں میں آلودگی کا الرٹ برقرار ہے۔

امریکا کے بڑے حصے میں دھویں کی تہہ چھائی ہوئی ہے جبکہ پنسلوانیا، میری لینڈ، واشنگٹن ڈی سی اور نیویارک میں جلتی ہوئی لکڑیوں کی بو آرہی ہے۔

نیویارک، نیوجرسی اور فلاڈیلفیا کے ہوائی اڈوں پر آنے والی پروازوں کو دوسرے دن بھی روک دیا گیا ہے۔ نیویارک میں ایئرکوالٹی انڈیکس 178 پر پہنچ گیا جو کہ 200 تک پہنچنے کا خدشہ ہے۔

نیویارک میں آوٹ ڈور تقریبات منسوخ کردی گئیں، چڑیا گھروں سمیت کئی ریاستوں میں اسکولز جزوی طور پر بند کردیئے گئے۔