پاکستان پیپلز پارٹی کی جانب سے بجٹ پر اعتراضات اٹھائے جانے کے بعد اتحادی حکومت میں اختلافات سامنے آںے لگے ہیں، ن لیگ اور پیپلزپارٹی میں بظاہر دوریاں بڑھتی نظر آرہی ہیں۔

ان حالات کے پیش نظر وزیراعظم شہباز شریف کی زیرصدارت اہم اجلاس آج ہوگا، جس میں بلاول بھٹو سمیت دونوں پارٹیوں کے رہنما شریک ہوں گے۔

بلاول بھٹو نے وفاقی حکومت سے وعدے پورے نہ کرنے کا شکوہ کیا تھا، جبکہ احسن اقبال نے بلاول کے بیان پر تنقید کی تھی۔

اس حوالے سے قومی اسمبلی میں اظہارِ خیال کرتے ہوئے وزیر خزانہ اسحاق ڈار نے وضاحت کی اور کہا کہ ہم محاذ آرائی نہیں چاہتے، ہم نے مل کر کام کیا ہے، پیپیلز پارٹی کے وزرا کے ساتھ مل کر مسائل کو حل کریں گے۔

انہوں نے کہا کہ جمعہ کو اس حوالے سے ہونے والی تفصیلی میٹنگ میں وزیراعلیٰ سندھ بھی شریک تھے، میٹنگ میں کافی حد تک روڈ میپ بنایا گیا، امید ہے پیپلز پارٹی کے ساتھ معاملہ حل ہوجائے گا۔