کراچی کے علاقے منگھوپیر میں اینٹی وہیکل لفٹنگ سیل (ای وی ایل سی) کے اہلکار کی فائرنگ سے شہری کی ہلاکت کی تحقیقات جاری ہیں، فائرنگ کرنے والے اہلکار کی شناخت ہوگئی۔

ایس ایس پی عبدالرحیم شیرازی کے مطابق منگھو پیر میں گزشتہ روز اے وی ایل سی اہلکار کی فائرنگ سے شہری کی ہلاکت کا واقعہ پیش آیا تھا، فائرنگ کرنے والے اہلکار کی شناخت ہوگئی، اے ایس آئی مختیار نے نوجوان پر فائرنگ کی۔

عبدالرحیم شیرازی نے مزید بتایا کہ اے ایس آئی مختیار نے 2 شادیاں کر رکھی ہیں، گرفتاری کیلئے دونوں گھروں پر چھاپہ مارا گیا ہے۔

انھوں نے مزید بتایا کہ فائرنگ کے واقعہ میں ڈی ایس پی قمرالزمان کو بھی شامل تفتیش کیا گیا ہے کیونکہ ڈی ایس پی کی گاڑی ناکے کیلئے استعمال ہوئی تھی۔

یاد رہے کہ گزشتہ روز واقعہ کے بعد اہل خانہ کا کہنا تھا کہ مقتول ہاشم اوردوست بلوچستان میں نورانی کے مزار پر گھومنے گئے تھے، واپس آتے ہوئے پولیس کے اشارے پر نہ رکنے پر اہلکاروں نے دونوں پر فائرنگ کی۔

لواحقین نے بتایا کہ فائرنگ سے جاں بحق ہاشم 15 سال سے دبئی میں مقیم تھا اور شادی کے لیے کراچی آیا تھا، ہاشم کی ایک ماہ قبل شادی ہوئی تھی۔