ملکہ کوہسارمری کے سو سالہ تاریخی ایم سی گورنمنٹ ہائی اسکول جھیکاگلی کی اراضی کو چیف جسٹس لاہور کے احکامات کے بعد جوڈیشل کمپلیکس مری کےنام ٹرانسفرکردیا گیا، طالبعلموں کا کہنا ہے کہ خدارا ہمیں تعلیم سے محروم نہ کریں۔

سو سالہ قدیم جھیکا گلی مری اسکول اب جوڈیشل کمپلیکس بنے گا۔ اسکول کی اراضی کو جوڈیشل کمپلیکس مری کے نام ٹرانسفر کردیا گیا۔

28 اگست کو ڈپٹی سیکریٹری بورڈ آف ریونیو نے ڈپٹی کمشنر راولپنڈی اور ایڈیشنل ڈپٹی کمشنر مری کو خط لکھا۔

خط میں چیف جسٹس لاہور ہائی کورٹ کی زیر صدارت ہونے والے 21 اگست کے اجلاس کا حوالہ دیا گیا جس میں چیف جسٹس نے ہدایت کی کہ مری میں صوبائی حکومت کی 2 کنال 15 مرلہ زمین سات روز میں عدلیہ کے حوالے کر دی جائے۔

طلبہ، والدین اور اہلیانِ مری کہتے ہیں کہ اس فیصلے سے بچوں کا مستقبل داوُ پر لگ گیا۔ انھوں نے مطالبہ کیا ہے کہ اسکول کی اراضی کو جوڈیشل کمپلیکس کے لیے استعمال نہ کیا جائے بلکہ اسکول کو رہنے دیا جائے تا کہ طلبہ کا مستقبل تباہ ہونے سے بچ سکے۔

یہ بھی پڑھیں :

کراچی: بلڈر مافیا کی کارستانی، تاریخی عمارت جزوی منہدم

امریکا میں پاکستانی سفارتخانے کی ملکیت تاریخی عمارت فروخت

یاد رہے کہ مری جھیکاگلی ایم سی گورنمنٹ ہائی اسکول کی عمارت 1924 میں قائم کی گئی جس کو آج سو سال مکمل ہونے کو ہیں۔ اسکول میں آج بھی 200 سے زائد طلباء و طالبات تعلیم حاصل کر رہے ہیں۔