سابق اٹارنی جنرل آف پاکستان اور معروف قانون دان شاہ خاور ایڈووکیٹ کہتے ہیں کہ الیکشن کمیشن آف پاکستان انتخابات کی تاریخ کل (بدھ کو) دے گا، کیونکہ ملک کی اعلیٰ انتخابی اتھارٹی قانون سے بالاتر نہیں ہو سکتی۔

آج نیوز کے پروگرام ”فیصلہ آپ کا“ میں گفتگو کرتے ہوئے شاہ خاور ایڈووکیٹ نے کہا کہ ’میرے خیال میں ای سی پی کل تک انتخابی شیڈول کا اعلان کردے گا کیونکہ وہ آئین یا قانون سے باہر نہیں جا سکتے‘۔

سپریم کورٹ 2 نومبر کو نوے روز میں انتخابات کیس کی سماعت کرنے والا ہے، جس کے بعد شاہ خاور ایڈووکیٹ کے مطابق ممکنہ طور پر انتخابات کی تاریخ دیدی جائے گی۔

سپریم کورٹ نے ای سی پی اور وفاقی حکومت کو نوٹس جاری کرنے کے بعد 2 نومبر تک کیس کی سماعت ملتوی کردی تھی، کیس کی درخواستوں میں مطالبہ کیا گیا ہے کہ ملک میں عام انتخابات آئینی طور پر 90 دن کے اندر کرائے جائیں۔

ان سے نوے روز میں انتخابات کیس کے حوالے سے سوال پوچھا گیا تو انہوں نے کہا کہ ’میرے خیال میں بہتر ہے کہ الیکشن کمیشن کل تاریخ دے‘۔