نگراں وزیر داخلہ سندھ حارث نواز کا کہنا ہے کہ کالعدم ٹی ٹی پی ملک میں تخریب کاری کی کارروئیاں کر رہی ہے، پاکستان میں دہشت گردی میں افغان سرزمین استعمال ہو رہی ہے اور تارکین وطن ملوث ہیں۔

کراچی میں پریس کانفرنس کرتے ہوئے نگراں وزیر داخلہ سندھ حارث نواز کا کہنا تھا کہ غیر ملکیوں کے خلاف آپریشن جاری ہے، بغیر دستاویزات والوں کو واپس بھیج رہے ہیں، پاکستان میں دہشت گردی میں تارکین وطن ملوث ہیں، اور اس دہشت گردی میں افغان سرزمین استعمال ہو رہی ہے۔

نگراں وزیرداخلہ نے کہا کہ 41 ہزار غیرملکیوں کوسندھ سے واپس بھیجا ہے، ایک لاکھ 47 ہزار لوگ غیر ملکی ابھی بھی موجود ہیں، کالعدم ٹی ٹی پی ملک میں تخریب کاری کی کارروئیاں کر رہی ہے، آج بھی بارڈر پر پیاز کی گاڑی سے اسلحہ برآمد ہوا ہے۔

حارث نواز کا کہنا تھا کہ ملٹری کورٹس اس وقت بہت ضروری ہیں، اس وقت متحد ہونے کی ضرورت ہے، دشمن کے بیانیے کو تو ڑنا ہے۔ 50 سے 60 کرمنلز کو ہم نے مارا ہے، صحافی جان مہر کے قاتلوں کے پیچھے ہیں جلد پکڑ لیں گے، کچے میں اب سکون ہو گیا ہے، کچے میں آپریشن جاری ہے، آئی جی سندھ وہاں موجود ہیں۔

نگراں وزیر داخلہ سندھ نے کہا کہ اسٹاک مارکیٹ کی بہتری اچھا سائن ہے، کراچی میں جرائم میں کمی ہوئی ہے، تعلیمی اداروں میں منشیات کا استعمال کم ہوگیا ہے، اسمگلنگ اور گٹکا کو مکمل بند کر دیا گیا ہے۔