روس کا ایک شہری بغیر پاسپورٹ اور ویزا کے بزریعہ طیارہ امریکہ جا پہنچا جس پر امریکی تحقیقاتی ایجنسی ”ایف بی آئی“ کے افسران حیران رہ گئے۔

امریکی خبر رساں ادارے ”اے بی سی“ نیوز کے مطابق ایک روسی شہری مبینہ طور پر ڈنمارک سے لاس اینجلس جانے والے طیارے میں چپکے سے سوار ہوگیا۔

سرگئی ولادیمیروچ اوچیگاوا نامی اس شخص نے مبینہ طور پر 4 نومبر کو کوپن ہیگن سے لاس اینجلس کے لیے بنا کسی سفری دستاویز کے سفر کیا۔

امریکہ پہنچنے پر جب حکام نے دستاویزات طلب کیے تو اوچیگاوا امریکہ میں داخل ہونے کے لیے پاسپورٹ یا ویزا پیش کرنے سے قاصر رہا۔

جب حکام کی طرف سے پوچھ گچھ کی گئی تو اوچیگاوا نے ’امریکہ میں اپنے سفر کے بارے میں غلط اور گمراہ کن معلومات دیں اور یہ بھی کہا کہ وہ اپنا امریکی پاسپورٹ ہوائی جہاز میں بھول گیا ہے۔

اوچیگاوا کے خلاف درج کی گئی شکایت میں کہا گیا ہے کہ پرواز کے دوران اسے نشستیں بدلتے ہوئے، ہر کھانے کی خدمت کے دوران دو وقت کا کھانا کھاتے ہوئے دیکھا گیا، اور ایک موقع پر اس نے چاکلیٹ کھانے کی کوشش کی جو کیبن کریو کے ارکان کی تھی۔

شکایت میں مزید کہا گیا کہ روسی شہریوں کے پاس امریکہ میں داخلے کے لیے ایک درست ویزا اور پاسپورٹ ہونا ضروری ہے، جب حکام نے اس کے بیگ کی تلاشی لی تو اوچیگاوا کے پاس مبینہ طور پر پاسپورٹ کے کچھ حصے اور اسرائیلی شناختی کارڈ موجود تھا لیکن مطلوبہ دستاویزات مکمل نہیں تھیں۔

شکایت کے مطابق، جب افسران نے مبینہ طور پر اس کا نام ریکارڈ میں تلاش کرنے کی کوشش کی تو کچھ سامنے نہیں آیا۔

ایف بی آئی کے ساتھ انٹرویو میں اوچیگاوا نے مبینہ طور پر کہا کہ اس نے ایک روسی یونیورسٹی سے معاشیات اور مارکیٹنگ میں پی ایچ ڈی کی ہے۔

شکایت کے مطابق ’اوچیگاوا نے دعویٰ کیا کہ وہ تین دن سے سویا نہیں اور سمجھ نہیں پا رہا کہ کیا ہو رہا ہے‘ اور کہا کہ ’شاید اس کے پاس امریکہ آنے کے لیے ہوائی جہاز کا ٹکٹ تھا‘۔

شکایت میں مزید کہا گیا کہ روسی شہری نے کہا اسے یاد نہیں کہ وہ جہاز پر کیسے چڑھا اور وہ یہ نہیں بتائے گا کہ وہ کوپن ہیگن کیسے اور کب پہنچا یا وہ وہاں کیا کر رہا تھا۔ اس نے مبینہ طور پر کہا کہ اسے یاد نہیں ہے کہ وہ جہاز میں کیسے سوار ہوا۔