لوئر دیر میں ایک بزرگ شخص تعلیم حاصل کرنے کیلئے تریسٹھ سال کی عمر میں سرکاری اسکول میں داخلہ لیا، لیکن کچھ ہی دنوں بعد وہ اچانک غائب ہوگئے۔

احادیث پڑھنے کے خواہش مند لوئر دیر کے بزرگ دلاور خان کے دل میں تریسٹھ سال کی عمر میں تعلیم حاصل کرنے کی خواہش جاگی تو انہوں نے ایک سرکاری اسکول میں داخلہ لے لیا۔

دلاور خان نے تعلیم کے حصول کیلئے کسی کے طعنوں کی پرواہ نہ کی اور بچوں کے ساتھ بیٹھ کر کلاسیں لینا شروع کردیں۔

دلاور خان نے کہا کہ اللہ نے تعلیم کا شوق دل میں دالا تو میں اسکول آگیا اور استادوں کو کہا کہ میں پڑھنے آؤں گا۔

اساتذہ نے بھی دلاور خان کے جذبے کو سراہا اور کہا کہ پڑھنے کیلئے عمر کی کوئی حد نہیں، ’بندہ چاہے تو ہر عمر میں پڑھ سکتا ہے‘۔

لیکن افسوس کہ دلاور خان نے ابھی ”اے بی سی ڈی“ ہی لکھنا ہی سیکھا تھا کہ ان کے داخلے کی خبر سوشل میڈیا پر پھیل گئی، جس کے بعد ٹک ٹاکرز اور یوٹیوبرز نے انہیں اپنی ویڈیوز اور وی لاگز بنانے کیلئے اتنا تنگ کیا کہ بزرگ شخص نے اسکول آنا ہی چھوڑ دیا۔