دعائیں رنگ لے آئیں طویل خشک سالی کے بعد ایبٹ آباد شہر میں بارش اور گلیات میں برفباری ہوگئی۔سیاحوں نے نتھیاگلی کا رُخ کر لیا۔ دوسری طرف وفاقی دارالحکومت اسلام آباد میں بارش کے باعث خشک سردی ختم ہوگئی اور موسم شدید سرد ہوگیا۔

ایبٹ آباد میں بارش اور برفباری ہونے کے بعد لوگوں میں خوشی کی لہر دوڑ گئی۔

برفباری سے لطف اندوز ہونے کے لئے سیاحوں کی بڑی تعداد نتھیاگلی، ڈونگا گلی اور ایوبیہ پہنچ گئی۔

سیاحوں کا کہنا ہے کہ بارش اور برفباری سے خوبصورت وادیاں مزید نکھر گئیں۔ یہاں آکر بہت اچھا محسوس ہورہا ہے اور ہم بہت لطف اندوز ہورہے ہیں۔

سیاحوں کا کہنا ہے کہ اس سال برفباری نے بہت انتظار کروایا، ملک کے دیگر حصوں سے بھی لوگوں کو آنا چاہیے اور اپنی زندگی کے لمحات کو یادگار بنانا چاہیے۔

گلیات ڈویلپمنٹ اتھارٹی (جی ڈی اے) کے ترجمان کا کہنا ہے کہ ہم نے برفباری سے بند ہونے والے تمام روڈ کلئیر کر دیے ہیں۔ سیاح احتیاطی تدابیر پر عملدرآمد کریں۔

جی ڈی اے کے ترجمان کے مطابق سیاحوں کو چاہیے کہ محتاط ڈرائیونگ کریں اور گرم ملبوسات اپنے ساتھ رکھیں تاکہ وہ حادثات سے محفوظ رہیں۔

اسلام آباد میں بارش

وفاقی دارالحکومت اسلام آباد میں بارش کے باعث خشک سردی ختم ہوگئی اور موسم شدید سرد ہوگیا۔

شہر میں وقفے وقفے سے بارش کے بعد شہریوں نے موسم کی مناسبت سے گرما گرم پکوان اورسوپ انجوائے کرنے کا پروگرام بنایا۔

واضح رہے کہ پاکستان کے محکمہ موسمیات (پی ایم ڈی) نے خبردار کیا ہے کہ 30 اور31 جنوری کو ملک کے بالائی علاقوں میں شدید برف باری کا امکان ہے جس سے آمدورفت متاثر ہو سکتی ہے۔

میٹ آفس کی جانب سے جاری ایک بیان میں سیاحوں کو دو دنوں (منگل اور بدھ) کے دوران محتاط رہنے کا مشورہ دیا گیا ہے۔