امیر جماعت اسلامی سراج الحق نے کہا ہے کہ راتوں رات 2 خاندانوں کی بادشاہت قائم کی گئی، چیف الیکشن کمشنر استعفیٰ دیں، انتخابات میں دھاندلی کی تحقیقات کیلئے آزادانہ کمیشن بنایا جائے۔

اسلام آباد میں پریس کانفرنس کرتے ہوئے سراج الحق نے کہا کہ دنیا جانتی ہے 8 فروری کو الیکشن کے نام پر سنگین مذاق کیا گیا۔ اگر الیکشن اسی مذاق کا نام ہے تو یہ قابل برداشت نہیں، ہم سول سپریمیسی (بالا دستی) کی تحریک جاری رکھیں گے۔

انھوں نے یہ بھی کہا کہ اںتخابات کی تحقیقات تب ہی ہوسکتی ہیں جب الیکشن کمشنر مستعفی ہوں، اس لئے چیف الیکشن کمشنر استعفیٰ دیں۔ قوم کے 50 ارب کا حساب دیں۔

ان کا کہنا تھا کہ نواز شریف نے ووٹ کو عزت دو کا نعرہ لگایا پھر چھوڑا، جماعت اسلامی ووٹ کو، قوم کو عزت دو کی جدوجہد جاری رکھے گی۔

سیاسی حریفوں پر تنقید کرتے ہوئے سراج الحق نے کہا کہ ان لوگوں کی سیاست ذات اور خاندان کے لیے ہے، ہماری سیاست پچیس کروڑ عوام کی جدوجہد کیلئے ہے۔

امیر جماعت اسلامی نے کہا کہ کراچی کے 6 حلقوں میں جماعت اسلامی کی کامیابی کو شکست میں بدلا گیا۔

انھوں نے کہا کہ جماعت اسلامی کے پاس ان حلقوں کے 99 فیصد نتائج فارم 45 کے ساتھ موجود ہیں، ملک میں فیصلے پہلے ہوتے ہیں، انتخابات بعد میں ہوتے ہیں۔