پاکستان کرکٹ ٹیم سے ڈراپ آل راؤنڈر عامر جمال نے کپتان بابر اعظم کی تجویز دل پر لے لی۔

قومی کرکٹر عامر جمال نے آئرلینڈ اور انگلینڈ کے خلاف شیڈول سیریز کے لیے منتخب ہونے والے ٹی 20 اسکواڈ سے نظر انداز کیے جانے کے بعد سوشل میڈیا پر ایک پیغام پوسٹ کیا ہے۔

عامر جمال وارک شائر کی جانب سے انگلش کاؤنٹی سیزن کھیل رہے ہیں، انہوں نے اپنی بیٹنگ کی ویڈیو انسٹاگرام اکاؤنٹ پر شیئر کی جس میں پہلی اننگز میں 40 رنز باسکور کیے۔

عامر جمال نے ویڈیو کے ساتھ معنی خیز کیپشن لکھا کہ ’چیزیں ہمیشہ وہی نہیں ہوتیں جو وہ نظر آتی ہیں، پہلی ظاہری شکل بہت سے لوگوں کو دھوکا دیتی ہے۔‘

قومی آل راؤنڈر نے اس کے بعد منہ پر انگلی رکھنے کی ایموجی بھی بنائی، جس سے کرکٹ شائقین اور سوشل میڈیا صارفین یہ سوچنے پر مجبور ہوگئے ہیں کہ یہ معنی خیز پیغام کسی کے لیے کوئی خفیہ اشارہ ہے یا عامر جمال نے علامتی انداز اختیار کرتے ہوئے کسی خاص شخص کو تنقید کا نشانہ بنایاہے۔

واضح رہے کہ گزشتہ دنوں آئرلیند روانگی سے قبل کپتان بابر اعظم نے عامر جمال کی ٹیسٹ کرکٹ میں عمدہ کارکردگی کا اعتراف کرتے ہوئے کہا تھا کہ عامر کو ٹی 20 فارمیٹ کے لیے اپنی صلاحیتوں کو بہتر بنانے کے لیے مزید تجربہ اور میچز کھیلنے کی ضرورت ہے۔

ان کا کہنا تھا کہ عامر جمال کا ٹی 20 اور ٹیسٹ کرکٹ کا موازنہ نہیں کیا جاسکتا وہ جس نمبر پر بیٹںگ کرتے ہیں ہمیں ایک پاور ہٹر کی ضرورت ہے۔