Aaj News

اتوار, جولائ 14, 2024  
08 Muharram 1446  

آرمی چیف سے کمیونسٹ پارٹی آف چائنہ مرکزی کمیٹی عالمی شعبہ کے وزیر کی ملاقات

ملاقات میں باہمی دلچسپی کے امور پر تبادلہ خیال کیا گیا، آئی ایس پی آر
شائع 21 جون 2024 06:39pm

کمیونسٹ پارٹی آف چائنا کی مرکزی کمیٹی کے شعبہ بین الاقوامی امور کے وزیر لیو جیان چاؤ نے جنرل ہیڈ کوارٹرز (جی ایچ کیو) راولپنڈی کا دورہ کیا، جہاں انہوں نے آرمی چیف جنرل سید عاصم منیر سے ملاقات کی۔

آئی ایس پی آر کے مطابق ملاقات کے دوران علاقائی امن و استحکام سمیت باہمی دلچسپی کے امور پر تبادلہ خیال کیا گیا جبکہ چین پاکستان اقتصادی راہداری (سی پیک) پر حالیہ پیش رفت کا جائزہ بھی لیا گیا۔

آرمی چیف جنرل سید عاصم منیر نے چین کے ساتھ اسٹریٹجک شراکت داری کے لئے پاکستان کے غیر متزلزل عزم کا اعادہ کیا اور چین کے بیلٹ اینڈ روڈ انیشیٹو کے اہم منصوبے سی پیک کی کامیابی کے لئے مکمل تعاون کے عزم کا اعادہ کیا۔

چینی وزیر لیو جیان چاو نے کہا کہ وہ چین میں دونوں ممالک کی قیادت کے درمیان کامیاب ملاقاتوں کے بعد پاکستان کا دورہ کر رہے ہیں، انہوں نے دونوں ممالک کے درمیان دیرینہ برادرانہ تعلقات کی اہمیت پر زور دیا اور سی پیک پر ہونے والی پیش رفت پر اطمینان کا اظہار کرتے ہوئے اس کی بروقت تکمیل کے لئے چین کے عزم کو دھرایا۔

چینی وزیر نے علاقائی امن و استحکام برقرار رکھنے کے لئے پاکستان کی کوششوں کو بھی سراہا۔

ISPR

Army Chief General Asim Munir