اسکوٹر ون ویلنگ کرتب سے پریشان شہریوں نے دو اسکوٹرز پل سے نیچے پھینک دیے۔

بھارتی میڈیا کے مطابق ریاست کرناٹک کے دارالحکومت بنگلورو میں یہ واقعہ پیش آیا جب ویلنگ سے پریشان شہریوں نے فلائی اوور سے دو اسکوٹر نیچے پھینک دیے جس کی ویڈیو سوشل میڈیا پر وائرل ہو رہی ہے۔

وائرل ہونے والی ویڈیو میں لوگوں کو اسکوٹر نیلامنگلہ فلائی اوور سے سڑک پر پھینکتے ہوئے دیکھا جا سکتا ہے۔ ویڈیو مناظر وہاں موجود لوگوں نے اپنے موبائل فون میں قید کیے۔

سوشل میڈیا پلیٹ فارم ایکس پر ویڈیو شیئر کرتے ہوئے صحافی شریاس ایچ ایس نے لکھا کہ ’نیلامنگلہ کے ٹریفک زون میں ناراض ارکان نے ویلنگ کرنے والے دو افراد کے اسکوٹر فلائی اوور سے نیچے پھینک دیے۔

ویڈیو پر کچھ سوشل میڈیا صارفین نے اسٹنٹ پرفارمرز کی حرکتوں پر غصے کا اظہار کیا، جبکہ کچھ صارفین نے فلائی اوور سے اسکوٹرز نیچے پھینکنے والوں کو تنقید کا نشانہ بنایا۔