Aaj News

بدھ, فروری 19, 2025  
21 Shaban 1446  

بی پی ایل ہنگامے میں نیا موڑ، تنخواہیں ادا نہ کرنے پر پولیس نے فرنچائز مالک کو گرفتار کرلیا

فرنچائز کے مالک نے قسطوں میں تمام ادائیگیوں کا وعدہ کیا ہے، بنگلادیشی میڈیا رپورٹ
شائع 04 فروری 2025 12:11pm

بنگلادیش پریمئیر لیگ (بی پی ایل) میں تنخواہوں کی ادائیگی نہ کرنے کے معاملے پر دربار راجشاہی کے مالک کو پولیس نے حراست میں لے لیا ہے۔

میڈیا رپورٹس کے مطابق بی پی ایل فرنچائز دربار راجشاہی کے مالک شفیق رحمان نے حکومت کو 10 فروری تک کھلاڑیوں کو قسطوں میں تمام ادائیگیوں کا وعدہ کیا ہے۔

قبل ازیں میڈیا سے بات چیت میں دعویٰ کیا تھا کہ تمام غیرملکی پلیئرز کی گھروں کو واپسی کیلیے ریٹرن ٹکٹس کا انتظام کرلیا گیا جبکہ ریٹرن ٹکٹ نہ ملنے کے باعث کئی غیرملکی کرکٹرز بنگلادیش میں پھنس گئے ہیں، جن میں پاکستان کے محمد حارث بھی شامل تھے۔

معاوضوں کی عدم ادائیگی کی وجہ سے کھلاڑیوں نے پریکٹس اور غیرملکی کرکٹرز نے گروپ اسٹیج میچز کا بائیکاٹ کردیا تھا جس کےباعث فرنچائز کو میچ کیلئے مقامی کرکٹرز کی خدمات لینا پڑی تھیں۔

بنگلادیش ٹی 20 لیگ میں انوکھا واقعہ، بس ڈرائیور نے غصے میں کھلاڑیوں کی کِٹس لاک کردیں

مقامی کھلاڑیوں کے چیک باؤنس ہوئے، ٹیم ہوٹل کی ادائیگیاں نہیں کی گئیں جبکہ بس ڈرائیور نے کھلاڑیوں کا سامان بس کے اندر لاک کردیا تھا ساتھ ہی واضح کیا کہ جب تک ٹرانسپورٹ کے بقایاجات ادا نہیں کیے جائیں گے وہ یہ سامان واپس نہیں کریں گے۔

تمام معاملات سے بنگلادیش پریمئیر لیگ (بی پی ایل) کی ساکھ کو شدید نقصان پہنچا جس پر وزارت کھیل کی جانب سے معاملے کا نوٹس بھی لے لیا ہے۔

پولیس نے شفیق الرحمان کو حراست میں لیا تو انہوں نے حکومتی عہدیداروں کو 10 فروری تک تمام واجبات ادا کرنے کی یقین دہانی کرائی۔

شفیق رحمان نے اس سے قبل اسپورٹس ایڈوائزر آصف محمود کو 2 فروری تک 50 فیصد ادائیگی کی یقین دہانی کرائی تھی مگر اپنے وعدے پر پورا نہ اترے تھے، جس پر پولیس نے ان کے خلاف کارروائی کرتے ہوئے انہیں حراست میں لے لیا۔

bpl