واسا راولپنڈی نے شہر میں خشک سالی کے پیش نظر ڈراؤٹ ایمرجنسی نافذ کر دی ہے۔ ایم ڈی واسا محمد سلیم اشرف کے مطابق اگر فروری اور مارچ میں بارشیں نہ ہوئیں تو پانی کا بحران مزید سنگین ہوجائے گا، جبکہ محکمہ موسمیات نے بھی قلیل بارشوں کی پیشگوئی کی ہے۔

ایم ڈی واسا نے بتایا کہ آبادی میں مسلسل اضافے اور کمرشل سرگرمیوں کے باعث پانی کے ذخائر کم ہو رہے ہیں، جبکہ خشک سالی کے باعث دستیاب پانی کی تقسیم بھی مشکل ہو چکی ہے۔ اس صورتحال میں عوام کو پانی کے کم استعمال کی ترغیب دینے کے لیے آگاہی مہم بھی شروع کر دی گئی ہے۔

انہوں نے مزید بتایا کہ خشک سالی کے باعث ڈیموں اور زیر زمین پانی کے ذخائر بری طرح متاثر ہوئے ہیں، جبکہ پانی کی طلب اور سپلائی میں بھی شدید کمی دیکھی جا رہی ہے۔ شہر میں یومیہ پانی کی طلب 68 ملین گیلن ہے، جبکہ دستیاب پانی صرف 51 ملین گیلن ہے، جو راول ڈیم، خان پور ڈیم اور ٹیوب ویلز کے ذریعے فراہم کیا جا رہا ہے۔

ایم ڈی واسا کے مطابق زیر زمین پانی کی سطح 700 فٹ تک نیچے جا چکی ہے، جس کے پیش نظر پانی کے غیر ضروری استعمال پر سخت کارروائی کی جائے گی۔ اب تک پانی کے ضیاع پر دو شہریوں کے چالان کیے جا چکے ہیں اور آئندہ خلاف ورزی کرنے والوں کے خلاف مقدمات بھی درج کیے جائیں گے۔

انہوں نے شہریوں سے اپیل کی کہ پانی کا استعمال کم کریں اور واسا کے ساتھ مکمل تعاون کریں۔ علاوہ ازیں، خان پور ڈیم کی بھل صفائی کے باعث 22 فروری تک پانی کی سپلائی بھی معطل رہے گی۔