حیدرآباد میں معروف سندھی شاعر ڈاکٹر آکاش انصاری کے قتل کا معمہ حل ہونے لگا، ابتدائی طور پر آگ لگنے سے ہلاکت کا دعویٰ جھوٹ نکلا۔ تحقیقات میں انکشاف ہوا کہ آکاش انصاری کی موت حادثہ نہیں بلکہ قتل تھا۔

ایم ایل او سول اسپتال حیدرآباد عبدالحمید نے تصدیق کی ہے کہ آکاش انصاری کے جسم پر تیز دھار آلے کے زخم موجود تھے، جبکہ زیادہ تر جسم جلا ہوا تھا۔ صوبائی وزیر تعلیم سردار شاہ نے بھی آکاش انصاری کے جسم پر چھریوں کے زخموں کی تصدیق کی۔

پولیس نے قتل کے الزام میں مقتول کے لے پالک بیٹے لطیف آکاش اور ان کے ڈرائیور کو بدین سے حراست میں لے لیا۔ لطیف آکاش نے ابتدائی طور پر حیدرآباد کی سٹیزن کالونی میں آکاش انصاری کی موت کو گھر میں آتشزدگی کا نتیجہ قرار دیا تھا، تاہم تحقیقات کے دوران ان کے بیانات میں تضاد پایا گیا جس کے بعد انہیں گرفتار کر لیا گیا۔

ڈاکٹر آکاش انصاری کی تدفین گزشتہ شب ان کے آبائی شہر بدین میں کردی گئی ہے، جہاں نماز جنازہ میں صوبائی وزرا، شعرا، ادیبوں اور زندگی کے مختلف شعبوں سے تعلق رکھنے والے افراد نے بڑی تعداد میں شرکت کی۔

پولیس کی تحقیقاتی ٹیم کا جائے وقوعہ کا دورہ

تحقیقاتی ٹیم کےسربراہ ایس پی مسعود اقبال جائے وقوعہ پر پہنچ گئے، ٹیم میں ڈی ایس پی سی آئی اے افتخار برڑو اوردیگرشامل تھے۔

تحقیقاتی ٹیم نے جائے وقوعہ سے شواہد اکٹھے کیے۔ مسعوداقبال کا کہنا ہے کہ شواہد کی بنیاد پرباریک بینی سے جائزہ لے رہے ہیں۔

شاہ لطیف کے خلاف ایک ایف آئی آرکا انکشاف

شاعر آکاش انصاری کے لے پالک بیٹے شاہ لطیف کے خلاف ایک ایف آئی آر بھی سامنے آئی ہے، آکاش انصاری نے 24 جولائی 2024 کو چوری کی ایف آئی آر درج کرائی تھی، ایف آئی آر میں چوری کرنے کی کوشش کی شکایت کی گئی تھی، بعد میں فریقین میں صلح کے بعد معافی تلافی ہوگئی تھی۔

حیدرآباد ایف آئی آر میں گھر سے 38 لاکھ روپے سے زائد رقم چوری کرنے کی کوشش کی شکایت درج کرائی گئی۔