کراچی میں موسم ایک بار پھر بدلنے لگا ہے، جہاں صبح سویرے ہلکی ٹھنڈ محسوس کی گئی، جس سے شہریوں کو خوشگوار احساس ہوا۔ محکمہ موسمیات کے مطابق آج دن بھر شہر میں تیز ہوائیں چلنے کا امکان ہے، جبکہ آئندہ 24 گھنٹوں کے دوران مطلع صاف رہے گا۔

محکمہ موسمیات کے مطابق کراچی کا زیادہ سے زیادہ درجہ حرارت 31 ڈگری سینٹی گریڈ تک جانے کا امکان ہے، جبکہ آج کم سے کم درجہ حرارت 19.5 ڈگری سینٹی گریڈ ریکارڈ کیا گیا۔

شہر میں اس وقت شمال مغربی سمت سے 14 کلومیٹر فی گھنٹہ کی رفتار سے ہوائیں چل رہی ہیں، جبکہ ہوا میں نمی کا تناسب 79 فیصد ہے۔

موسم میں اس ہلکی تبدیلی کے بعد کراچی کے باسیوں کو صبح اور رات کے وقت خوشگوار ٹھنڈک کا سامنا رہے گا، تاہم دن کے اوقات میں معمولی حدت برقرار رہنے کی توقع ہے۔