تونسہ شریف اور بہاولپور میں انسدادِ دہشتگردی ڈیپارٹمنٹ (سی ٹی ڈی) نے دہشتگردی کا بڑا منصوبہ ناکام بناتے ہوئے 6 دہشتگردوں کو ہلاک کر دیا۔

کاؤنٹر ٹیررازم ڈیپارٹمنٹ (سی ٹی ڈی) نے تونسہ شریف کے سرحدی گاؤں میں کارروائی کے دوران 5 دہشتگردوں کو ہلاک کر دیا، جبکہ 5 زخمی دہشت گرد جنگل کی طرف فرار ہوگئے۔

سی ٹی ڈی ترجمان کے مطابق خفیہ اطلاع پر سرحدی گاؤں کے قریب آپریشن کیا گیا جہاں دہشتگردوں نے سی ٹی ڈی اہلکاروں پر فائرنگ شروع کر دی۔ شدید فائرنگ کے تبادلے میں 5 دہشتگرد مارے گئے جبکہ 4 لاشیں اسپتال منتقل کر دی گئیں، ایک لاش دہشتگرد اپنے ساتھ لے گئے۔

کارروائی کے دوران بھاری مقدار میں اسلحہ، رائفلز، 3 آئی ای ڈیز، دستی بم اور دھماکہ خیز مواد برآمد کیا گیا۔ دہشتگردوں کی شناخت کا عمل جاری ہے جبکہ فرار ہونے والے عناصر کی تلاش کے لیے سرچ آپریشن کا دائرہ وسیع کر دیا گیا ہے۔ رومی اور تونسہ کے قریب چیک پوسٹس قائم کر دی گئی ہیں۔

ادھر بہاولپور میں بھی سی ٹی ڈی اور پنجاب پولیس نے مشترکہ کارروائی کرتے ہوئے فتنہ الہندوستان تنظیم سے تعلق رکھنے والے ایک اور خطرناک دہشتگرد کو ہلاک کر دیا۔ فائرنگ کے تبادلے میں تین دہشت گرد فرار ہوگئے۔ کارروائی کے دوران ہینڈ گرینیڈز اور گولیاں بھی برآمد کی گئیں۔

وزیر داخلہ محسن نقوی نے کامیاب کارروائی پر سی ٹی ڈی اور پنجاب پولیس کو خراج تحسین پیش کرتے ہوئے کہا کہ فتنۂ ہندوستان کے دہشت گردوں کو جہنم واصل کیا گیا، پولیس کی پیشہ وارانہ صلاحیتوں پر فخر ہے، دہشتگردوں کا پیچھا جاری رکھا جائے گا۔

وزیراعلیٰ پنجاب مریم نواز کی تونسہ کے قریب دہشت گردوں کے خلاف کامیاب کارروائی پر پنجاب پولیس اور سی ٹی ڈی کو شاباش دی۔

مریم نواز نے کہا کہ پنجاب پولیس اور سی ٹی ڈی فتنہ الہندوستان کے 6 دہشت گردوں کو جہنم واصل کرنے پر تحسین کی مستحق ہیں، دہشت گردوں کا تعاقب جاری رکھیں گے اور دشمن کے مذموم عزائم خاک میں ملا دیں گے۔