لاہور:معروف ترقی پسند شاعر اور لازوال غزلوں کے خالق احمد فراز کو ہم سے بچھڑے آج 8برس بیت گئے، احمد فراز نے شاعری کے ذریعے انسانی اقدار کے حق اور ظلم و جبر کے خلاف آواز بلند کی۔

بارہ جنوری 1931 کو کوہاٹ میں آنکھ کھولنے والے ترقی پسند شاعر احمد فراز نے شاعری کے ذریعے اپنے خیالات کا اظہار بڑے عمدہ انداز میں کیا۔ احمد فراز نے انسان کے ہاتھوں انسان پر ڈھائے جانے والے ظلم کے خلاف اپنی شاعری کے ذریعے آواز بلند کی۔

اپنی شاعری کے ذریعے انسانی اقدار کے حق اور ظلم و جبر کے خلاف قلم اٹھانے والے احمد فراز نے جنرل ضیاء کے دور میں قید و بند کی صعوبتیں برداشت کیں مگر اپنے نظریات تبدیل نہ کئے۔

احمد فراز کو ان کی شاعری پر بیشتر اعزازات سے بھی نوازا گیا۔ تاہم انہوں نے جنرل پرویز مشرف کے دور میں سرکاری پالیسیوں کی مخالفت کرتے ہوئے سرکاری ایوارڈ واپس کر دیا، پوری زندگی جدوجہد کرنے والے بیسویں صدی کے یہ عظیم شاعر 25 اگست 2008 کو وفات پاگئے۔