امریکی گلوکارہ جینیٹ جیکسن نے پچاس برس کی عمر میں اپنے پہلی اولاد کو جنم دیا ہے۔

ایک اعلان کے مطابق جینیٹ جیکسن اور ان کے شوہر، قطری کاروباری شخصیت وصام ال مانا نے اپنے بیٹے عیسیٰ ال مانا کی پیدائش پر بے حد خوشی کا اظہار کیا ہے۔

ان کے ترجمان نے مزید کہا کہ ’بچے کی پیدائش بغیر کسی دشواری اور تکلیف کے ہوئی اور جینیٹ آرام کر رہی ہیں۔‘

جینیٹ کے حاملہ ہونے کی خبر سب سے پہلے پچھلے سال اپریل میں منظر عام پر آئی تھیں جب انھوں نے اپنا ’ان بریک ایبل ٹور‘ ملتوی کر دیا تھا۔

اس وقت جینیٹ جیکسن نے اپنے ٹویٹر پر ایک ویڈیو شیئر کی تھی جس میں انھوں نے اپنے مداحوں کو بتایا کہ ٹور اس لیے ملتوی کیا گیا ہے کیونکہ ایک ’اچانک تبدیلی‘ آ گئی۔ ’میں سمجھتی ہوں کہ یہ ضروری ہے کہ میں آپ لوگوں کو بتاؤں۔ "برائے مہربانی اس بات کو سمجھیں کہ مجھے اس وقت ایسا کرنا ہے"۔

جینیٹ جیکسن نے سنہ 2012 میں وصام ال مانا سے شادی کی تھی اور ان کو لندن میں بچوں کے سامان کی خریداری کرتے ہوئے دیکھا گیا تھا۔

بشکریہ:بی بی سی اردو