حال ہی میں سنجے دت کی بائیوگرافی میں شاندار اداکاری کے ذریعے رنبیر کپور نے بولی وڈ میں اپنی دھاک بٹھادی ہے۔ ان کی فلم 'سنجو' نے انڈسٹری کے کئی ریکارڈز کو پاش پاش کردیا ہے۔

فلم 'سنجو' میں اداکاری کے بعد رنبیر کپور مختلف ہدایتکاروں کی توجہ اپنی جانب مبذول کرنے میں بھی کامیاب ہوگئے ہیں۔ گزشتہ دنوں یہ اطلاعات بھی سامنے آرہی تھیں کہ منّا بھی سیریز میں اب 'سرکٹ' کا کردار بھی رنبیر کپور ہی ادا کریں گے جبکہ ارشد وارثی کو فارغ کردیا جائے گا۔

ان دنوں رنبیر کی ادھیڑ عمر حلیے میں ایک تصویر سوشل میڈیا پر خوب گردش کررہی ہے تاہم مداح اسے دیکھ کر شش و پنج کا شکار ہیں کہ یہ واقعی رنبیر کپور ہیں بھی یا نہیں۔

        غیر ملکی میڈیا کے مطابق یہ تصویر رنبیر کپور کی ہی ہے، اس تصویر میں انہوں نے ایک معمر شخص کا روپ دھا رکھا ہے۔ اس تصویر کو دیکھ کر قیاس آرائیں کی جارہی تھیں کہ شاید وہ اپنی اگلی فلم میں ایک بوڑھے شخص کا کردار ادا کریں گے۔

لیکن ایسا نہیں ہے انہوں نے یہ روپ صرف ایک اشتہار میں کام کرنے کے لئے دھارا ہے، اس اشتہار میں وہ ایک بڑی عمر کے سیلز مین بنے ہیں۔

یاد رہے ان دنوں رنبیر کپور اپنی فلم 'براہمسترا' کی شوٹنگ میں مصروف ہیں۔ مداح اس فلم میں اُن کے علاوہ عالیہ بھٹ اور لیجنڈ اداکار امیتابھ بچن کو بھی دیکھ سکیں گے۔