شہرت ایک ایسی چیز ہے جو انسان کو یا تو بنا دیتی ہے یا مکمل طور پر بگاڑ دیتی ہے ،کبھی کبھی بہت زیادہ شہرت بھی کسی سے سنبھالی نہیں جاتی اور انسان بہت زیادہ مقبولیت کے باعث دیوانہ ہونے لگتا ہے۔

بھارتی اداکار نہ صرف اپنے ملک میں مشہور ہیں بلکہ بیرون ملک بھی ان کے چرچے ہیں کیونکہ بھارتی فلم انڈسٹری کا شمار عالمی شہرت یا فتہ انڈسٹریز میں ہوتا ہے۔

آج ہم آپ کیلئے بھارت کے ان مشہور لوگوں کی زندگی کی کچھ خوفناک حقیقتیں لے کر آئے ہیں جنہیں انہوں نے سب سے چھپائے رکھا ،لیکن انسان کب تک کسی چیز کو پوشیدہ رکھ سکتا ہے بالآخر انہوں نے بھی اپنی زندگی کے ان رازوں سے پردہ اٹھادیا جنہیں یاد کرکے ان کی روح کانپ جاتی ہے۔

دیپیکا پڈوکون

دیپیکا نے اپنے ماضی کو کھنگالتے ہوئے بتایا کہ بولی وڈ میں اپنی قسمت آزمائی کے دوران میں حد سے زیادہ ڈیپریشن کا شکار ہوگئی تھی،وہ دور میری زندگی کا تاریک ترین دور تھا جسے میں کبھی بھلا نہیں سکتی۔

دیپیکا نے اپنی ذہنی حا لت کو مد نظر رکھتے ہوئے ایک این جی اوقائم کی ہے جو ذہنی امراض اور شدید قسم کے ڈیپریشن میں مبتلا افراد کی مدد کرتی ہے۔

عامرخان

بولی وڈ کے معروف اداکار عامر خان بھی زندگی کے اس دور سے گزر چکے ہیں جسے یاد کرکے وہ پریشان ہو جاتے ہیں انہوں نے اپنی یادداشتوں کو کھنگالتے ہوئے بتایا کہ ان کے مشہور و معروف سماجی پروگرام ستے میو جیتے کی شوٹنگ کے دوران وہ شدید ذہنی ڈیپریشن میں مبتلا ہو گئے تھے۔

ان کا کہنا تھا کہ ہم لوگ ٹی وی پر بیٹھ کر لوگوں کے مسائل کے بارے میں بات تو کر سکتے ہیں لیکن ان کے حا لات محسوس نہیں کر سکتے ،جب میں اور میری ٹیم نے لوگوں کے حا لاتوں کا مشاہدہ کیا تو ہمیں ان کے دکھ کااحساس ہوا اور اس احساس نے ہمیں شدید کرب میں مبتلا کردیا۔

شمع سکندر

بھارتی ٹی وی ڈراموں کی معروف اداکارہ شمع سکندر ایک عرصے بعد ٹی وی پر نظر آرہی ہیں ،ایک انٹرویو کے دوران انہوں نے اپنی زندگی کے دکھ بھرے پچھلے ایک سال کے بارے میں بات کرتے ہوئے بتا یا کہ گزرا ہوا سال میری زندگی کا سب سے بھیانک سال تھا ،مجھے کچھ سمجھ نہیں آرہا تھا میں کیا کر ہی ہوں ،میں اپنے مستقبل کے بارے میں مکمل طور پر مایوس ہو چکی تھی لیکن پھر میں نے اپنے آپ کو سنبھالا اور زندگی کی کڑی حقیقتوں کا سامنا کیا۔

یو یو ہنی سنگھ

بھارت کے عالمی شہرت یافتہ گلوکار یو یو ہنی سنگھ کے مداحوں کی تعداد کروڑوں میں ہے جو ان کے بارے میں سب کچھ جاننا چاہتے ہیں لیکن ایک ایسا راز جسے ہنی نے سب سے چھپا یا ہے وہ یہ ہے کہ انہیں ایک خطرناک بیماری بائی پولر ڈس آرڈر لا حق ہے ۔

اپنی بیماری کے بارے میں بات کرتے ہوئے ان کا کہنا تھا کہ مجھے جب اس بیماری کا پتہ چلا تو مجھے بہت دکھ ہوا پہلے تو میں نے سب سے یہ بات چھپائی لیکن لوگ مجھ سے اتنی محبت کرتے ہیں کہ میں آپ کو بتانے پر مجبور ہو گیا ،مجھے یقین ہے آپ مجھے اب بھی وہی محبت اور پیار دیں گے جو پہلے دی تھی۔

واضح رہے کہ بائی پولر ڈس آرڈر میں انسان ذہنی طور پر ڈسٹرب ہوجاتا ہے اسے اپنے آپ پر اختیار نہیں رہتا کبھی بیٹھے بیٹھے اچانک رونے لگتا ہے اور کبھی خود ہی ہنسنے لگتا ہے۔