Aaj TV News

BR100 4,112 Decreased By ▼ -52 (-1.26%)
BR30 20,622 Decreased By ▼ -321 (-1.53%)
KSE100 39,633 Decreased By ▼ -555 (-1.38%)
KSE30 16,693 Decreased By ▼ -210 (-1.24%)

وزیراعلی پنجاب عثمان بزدار نے کہا ہے کہ 16 لاکھ سے زائد افراد کو 30 ارب کے قرضے آسان شرائط پر دیئے جائیں گے۔

وزیر اعلی نے صوبہ بھر کی بلند و بانگ عمارتوں، پلازوں، شاپنگ مالز میں فائر سیفٹی انتظامات کی انسپکشن کی ہدایت، حفیظ سنٹر میں آتشزدگی سے نقصانات کے ازالے کے لئے حتمی پلان طلب کرلیا اور 12 ربیع الاول مذہبی جوش و خروش کے ساتھ منانے کا اعلان بھی کیا۔

وزیراعلیٰ آفس میں پنجاب روزگار سکیم کے حوالے سے پنجاب سمال انڈسٹریز کارپوریشن اوربینک آف پنجاب میں معاہدے پر دستخط کیے گئے۔

اس موقع پر وزیر اعلی نے کہا کہ 16 لاکھ افراد میں 30 ارب کے قرضے انتہائی کم شرح پردیئے جائیں گے تاہم یہ قرضے 20 سے 50 سال تک کے مرد، خواتین اور خواجہ سراء اور خصوصی افراد حاصل کرسکیں گے، جبکہ عام افراد کے علاوہ چھوٹے کاروباری افراد کو بھی قرضے مل سکیں گے جس سے کاٹیج انڈسٹری کو فروغ ملے گا۔

دوسری جانب وزیر اعلی نے بلند عمارتوں میں فائر سیفٹی انتظامات کی چیکنگ کے لئے ہدایات جاری کرتے ہوئے کہا کہ بڑی بلڈنگ کی انتظامیہ فائر فائٹنگ کے لئے عمارتوں میں اپنا سسٹم لگانے کی ذمہ دار ہوں گی۔

وزیر اعلی نے حفیظ سنٹر میں آتشزدگی سے تاجروں کے ہونے والے نقصانات کے ازالے کے لئے میکانزم تین روز میں تشکیل دینے کی ہدایت کردی. وزیراعلی نے 12 ربیع الاول کو مذہبی جوش و خروش سے منانے کا اعلان کرتے ہوئے کہا کہ صوبہ بھر میں سیرت کانفرنسوں کا انعقاد ہوگا۔