خانہ جنگی کا شکار ملک شام میں امریکی ڈرون حملے میں القاعدہ کے سینیئر رہنما کو ہلاک کرنے کا دعویٰ کیا گیا ہے۔

غیر ملکی خبر رساں ادارے کے مطابق شام میں امریکی ڈرون حملے کے نتیجے میں القاعدہ کا سینیئر رہنما عبدالحامد المطر ہلاک ہوگیا، تاہم مزید کسی جانی نقصان کی کوئی اطلاع نہیں ملی۔ دو روز قبل داعش نے جنوبی شام میں امریکا کے زیر استعمال بیس کو بھی نشانہ بنایا تھا۔

ترجمان امریکی سینٹرل کمانڈ میجر جان رگسبی کے مطابق مذکورہ ڈرون حملہ جنوبی شام میں ایک امریکی چوکی پر حملے کے دو دن بعد کیا گیا ہے۔ انہوں نے کہا کہ حملہ ایک MQ-9 طیارے کا استعمال کرتے ہوئے کیا گیا۔

پینٹاگون کی جانب سے جاری بیان میں کہا گیا ہے کہ القاعدہ کے رہنما عبدالحامد المطر کو شمالی شام میں نشانہ بنایا گیا جب کہ القاعدہ رہنما کی ہلاکت سے دہشت گرد تنظیموں کی امریکی شہریوں اور اتحادیوں کو نشانہ بنانے کی صلاحیت متاثر ہوگی۔

قبل ازیں ستمبر میں بھی پینٹاگون نے باغیوں کے زیر کنٹرول شمال مغربی شام میں ایک حملہ کیا تھا، جس میں القاعدہ کا ایک اور سینئر لیڈر سلیم ابو احمد مارا گیا تھا۔