تہران: ایرانی پولیس نے جنوبی شہر شیراز میں اسکیٹ بورڈنگ ڈے پر حجاب نہ پہننے پر کئی نوجوان لڑکیوں کو گرفتار کرلیا۔

سرکاری خبر رساں ایجنسی ایرانا کو شیراز پولیس کے سربراہ فراج شجاعی نے بتایا کہ متعدد لڑکیوں نے “پروگرام کے اختتام پر مذہبی تحفظات اور قانونی اصولوں کا خیال کیے بغیر اپنے حجاب کو ہٹا دیا تھا۔”

ان کا کہنا تھا کہ عدلیہ کے تعاون سے اجتماع میں موجود متعلق متعدد مجرموں اور لوگوں کو شناخت کر کے گرفتار کیا گیا ہے“۔

پولیس کے سربراہ نے بتایا کہ ایران میں “گو اسکیٹ بورڈنگ ڈے” کے پروگرام کی ایک ویڈیو سوشل میڈیا پر وائرل ہوگئی تھی۔

فراج شجاعی نے کہا کہ مذہبی اور قانونی اصولوں کی پاسداری کیے بغیر کسی بھی مخلوط کھیل یا غیر کھیلوں کے اجتماع کا انعقاد ممنوع ہے۔

شہر شیراز کے گورنر لطف اللہ شیبانی نے کہا کہ یہ تقریب سماجی، مذہبی اور قومی اصولوں اور اصولوں کو توڑنے کی نیت سے منعقد کی گئی تھی۔

واضح رہے کہ ایران میں سنہ 1979 کے انقلاب کے بعد سے نافذ اسلامی قانون کے تحت کسی بھی مخلوط کھیل یااجتماع کے انعقاد پر پابندی ہے۔