اسلام آباد: وزیراعظم شہباز شریف نے اسلام آباد کے کورنگ نالہ میں سیلابی لہروں میں پھنسے چار بچوں کو بچانے پر ریسکیو ٹیم کی کارکردگی کو سراہا ہے۔

ان کا کہنا تھا کہ شدید موسمی حالات میں والدین اپنے بچوں کی حفاظت کے حوالے سے ذمہ داری کا مظاہرہ کریں۔

شہباز شریف نے پاک بحریہ، اسلام آباد کی ضلعی انتظامیہ، پولیس اور ریسکیو 1122 کے عملے کے بارے میں کہا کہ انہوں نے فرض شناسی کی عمدہ مثال قائم کی ہے۔

وزیراعظم میڈیا آفس سے منگل کو جاری ایک بیان کے مطابق شہباز شریف نے کہا کہ “طوفانی سیلابی ریلے میں ریسکیو کے عملے نے جس جانفشانی، چابکدستی، مہارت اور دلیری کا مظاہرہ کیا ہے اس پر انہیں خراج تحسین پیش کرتا ہوں۔”

انہوں نے کہا کہ راولپنڈی سمیت ملک بھر کی ضلعی انتظامیہ، پولیس اور ریسکیو ٹیمیں اسلام آباد کی ٹیم کی مثال کی تقلید کریں۔

انہوں نے کہا کہ طوفانی بارشوں اور سیلابی صورتحال میں قومی اور انسانی ہمدردی کے جذبے کے ساتھ اپنے اہل وطن کی مدد کریں۔