Aaj News

ہفتہ, جون 15, 2024  
08 Dhul-Hijjah 1445  

’بلدیاتی انتخابات کا بائیکاٹ کرکے میدان خالی نہیں چھوڑیں گے‘

فاروق ستار کا ایم کیو ایم کی حمایت کا اعلان
شائع 08 جنوری 2023 08:18pm

متحدہ قومی موومنٹ (ایم کیو ایم) پاکستان کے وفد سے ملاقات کے بعد فاروق ستا نے کہا کہ رابطہ کمیٹی کے وفد سے سیر حاصل گفتگو ہوئی ہے۔

ایم کیو ایم کی رابطہ کمیٹی کا وفد ایک بار پھر فاروق ستار کے گھر پہنچا جہاں انہوں نے وفد کا استقبال کیا۔

ملاقات کے بعد میڈیا سے گفتگو میں ایم کیو ایم کے کنوینئیر خالد مقبول صدیقی نے کہا کہ اہم مسئلے پر بات کرنے کیلئے فاروق ستار کے پاس آئے تھے۔

خالد مقبول صدیقی کا کہنا تھا کہ شہری علاقوں کی آبادیوں کو مردم شماری میں کم گنا گیا، مہاجروں کے علاقوں میں 80 ہزار آبادی پر یوسی بنائی گئی، سندھ حکومت نے اپنے حلقوں میں 25 ہزار افراد کی یوسی بنائی، بلدیاتی انتخابات سے قبل ہی دھاندلی کرلی گئی ہے۔

کنوینئیر ایم کیو ایم نے کہا کہ شہری علاقوں کی حقیقی نمائندگی کو چھینے کی کوشش کی گئی ہے، شفاف الیکشن کروانا الیکشن کمیشن کی ذمہ داری ہے، 11 جنوری کو الیکشن کمیشن کو ذمہ داری یاد کروائیں گے، ایسے انتخابات کو کوئی بھی تسلیم نہیں کرے گا۔

اس موقع پر فاروق ستار کا کہنا تھا کہ امید ہے ہم ماضی کی طرح مظلوموں کی آواز بنیں گے، ہم نے ماضی میں مظلوموں کیلئے بھرپور جدوجہد کی ہے۔

فاروق ستار نے بھی کہا کہ کراچی کی مردم شماری میں ظلم کیا گیا، ملک بھر کے لوگ روزگار کیلئے کراچی آتے ہیں، ہماری آبادی کو گنا نہیں جاتا تو ہم کہاں جاکراپنی گنتی کروائیں۔

ان کا کہنا تھا کہ خوشی ہے ایم کیو ایم اہم مسئلے پر احتجاج کرنے جارہی ہے، 70 کی دہائی سے اب تک ہماری آبادی کا تناسب 40 فیصد پر کھڑا ہے، یوسیز کا معاملہ براہ راست بلدیاتی انتخابات پر اثرانداز ہورہا ہے۔

فاروق ستار نے خالد مقبول صدیقی کی حمایت کا اعلان کرتے ہوئے کہا کہ ایم کیوایم کی حمایت کا اعلان کرتا ہوں، لگ رہا ہے کہ پیپلز پارٹی اور جماعت اسلامی میں اتحاد ہوگیا ہے ، اور یہ اتحاد مہاجروں کو دیوار سے لگانے کیلئے ہوا ہے۔

ان کا مزید کہنا تھا کہ متنازع یوسی سے بھائی کو بھائی سے لڑانے کی سازش کی گئی، ہمیں لڑوائے جانے کے خلاف ایک ہونے کا وقت آگیا ہے۔

خالد مقبول صدیقی نے کہا کہ بائیکاٹ کا آپشن ہوتا ہے، لیکن ہم میدان خالی نہیں چھوڑیں گے، ہم حکومت کاحصہ ہیں، پی ڈی ایم کا حصہ نہیں، ہم مسلم لیگ ن کے اتحادی ہیں کسی اور کے نہیں۔

Jamat e Islami

Khalid Maqbool Siddiqui

MQM Pakistan

Farooq Sattar

Pakistan People's Party (PPP)

karachi local bodies election

MQM Rabta Committee