نگراں وزیراعلیٰ پنجاب محسن نقوی کی زیر صدارت جشن بہاراں کے انتظامات کا جائزہ لینے کےلئے اجلاس منعقد ہوا، جس میں لاہور اور فیصل آباد میں جشن بہاراں کے انتظامات اور پروگرامز کے بارے میں تفصیلی بریفنگ دی گئی۔

پنجاب میں ہر سال کی طرح اس سال بھی موسم بہار کی اۤمد کو دلکش روایتی انداز میں خوش اۤمدید کہا جائے گا۔ جشن بہاراں کو رنگا رنگ طریقے سے منایا جائے گا۔ اس حوالے سے نگراں وزیراعلیٰ پنجاب محسن نقوی کی زیر صدارت اجلاس میں بسنت پر منعقدہ پروگرامز کی تیاریوں کا جائزہ لیا گیا۔

جشن بہاراں تہوار لاہور میں 5 سے 12مارچ کے دوران اور فیصل آباد میں 4 سے 12 مارچ تک منانے کی تجویز ہے۔

جشن بہاراں میں پھولوں کی نمائش، کھیل، ثقافت، سیاحت، موسیقی، برڈ اور پیٹ شو اور آتش بازی کی تقریبات کا انعقاد کیا جائےگا۔ گھڑ ڈانس، اونٹ ڈانس، دودھ دینے والی گائے اور بھینسوں کے مقابلے بھی ہوں گے جبکہ فوڈ میلے بھی لگائے جائیں گے۔

لاہور اور فیصل آباد میں محفل سماع کے علاوہ میراتھن ریس اور سائیکلنگ کے مقابلے بھی ہوں گے۔ ریس میں بچے، خواتین، اسپیشل پرسن اور اتھلیٹ حصہ لیں گے۔

جشن بہاراں میں میوزک کا ترکا بھی لگے گا، معروف گلوکار راحت فتح علی خان، ساحر علی بگا اور دیگر گلوکار میوزک شو پیش کریں گے۔

فیصل آباد کے اقبال اسٹیڈیم اور یونیورسٹی آف ایگریکلچرل میں جشن بہاراں کی تقریبات منعقد ہوں گی۔ جی سی یونیورسٹی فیصل آباد میں پاکستان، تاجکستان، ازبکستان اور کرغزستان کے کھلاڑی اسپورٹس ایونٹ میں حصہ لیں گے۔ فیصل آباد میں ہی ہیوی بائیک شو ہوگا۔

جشن بہاراں کے دوران پھولوں اور چنیوٹی فرنیچر کی نمائش منعقد ہوگی۔ 8 مارچ کوعالمی یوم خواتین کے حوالے سے خصوصی تقریبات بھی ہوں گی،خواتین کا مشاعرہ بھی ہوگا۔

لاہور میں والڈ سٹی اتھارٹی کے زیر اہتمام لیزر لائٹ اینڈ ساؤنڈ شو ہوگا لاہور اور فیصل آباد میں کارنیوال میں دلکش ثقافتی فلیوٹ بنائے جائیں گے۔ نہروں کو سجایا جائے گا اورلائٹنگ بھی ہوگی۔

گورنمنٹ کالج لاہور کے خصوصی مشعل مارچ میں 7ہزار سے زائد طلبہ شریک ہوں گے۔

نگراں وزیر اعلیٰ محسن نقوی کا جشن بہاراں اجلاس کے موقع پر کہنا تھا کہ جشن بہاراں کی تقریبات میں شہریوں کی زیادہ سے زیادہ شرکت یقینی بنائی جائے۔

نگراں وزیر اعلیٰ پنجاب محسن نقوی کی صدارت میں ہونے والے اجلاس میں صوبائی وزیر بلال افضل، چیف سیکرٹری، ایڈیشنل چیف سیکرٹری، سیکرٹریزاطلاعات و ثقافت، ہائیر ایجوکیشن، لوکل گورنمنٹ، لائیوسٹاک اور اسپورٹس حکام، کمشنر لاہور ڈویژن، کمشنر فیصل آباد، ڈپٹی کمشنر لاہور، ڈی جی لوکل گورنمنٹ، ڈی جی پی آر اور متعلقہ حکام نے شرکت کی۔ صوبائی وزیر ابراہیم مراد اور ڈپٹی کمشنر فیصل آباد ویڈیو لنک کے ذریعے اجلاس میں شریک ہوئے۔

موسم بہار میں درختوں کے نئے پتے اگتے ہیں اور طرح طرح کے پھول کھلتے ہیں اور انسان اس موسم میں اک خاص طرح کا سرور محسوس کرتا ہے، اسی لیے ہر سال جشن بہاراں کی رنگا رنگ تقریبات کا انعقاد کیا جاتا ہے۔