فلسطینی عوام سے اظہار یکجہتی اور اسرائیل کی مغربی کنارے میں کارروائیوں کے خلاف آج یوم القدس منایا جا رہا ہے۔

دنیا بھر میں مسلمان رمضان کے آخری جمعے کو یوم القدس کے طور پر مناتے ہیں۔ اس موقع پر پاکستان میں بھی ریلیاں نکالی جارہی ہیں۔ اس برس یوم القدس سے قبل فلسطینی علاقوں میں اسرائیل کی پرتشدد کارروائیوں میں اضافہ ہوگیا ہے۔

کراچی میں بھی فلسطینیوں سے اظہار یکجہتی اور قبلہ اول کو غاصبانہ یہودی قبضے سے آزادی دلوانے کی مناسبت سے یوم القدس منایا جا رہا ہے، مختلف جماعتوں کی جانب سے فلسطینیوں سے اظہار یکجہتی کے لئے ریلیاں نکالی جارہی ہیں۔

کراچی میں یوم القدس کی مرکزی ریلی سے قبل سیکیورٹی اور ٹریفک پلان جاری کیا گیا تھا۔ نمائش چورنگی سے شروع ہونے والی ریلی کا اختتامی پوائنٹ تبت سینٹر ہے۔ ایس ایس پی ایسٹ کا کہنا ہے کہ ریلی کی سیکیورٹی پر تقریبا 2 ہزارسیکیورٹی اہلکار تعینات کیے گئےہیں۔

ٹریفک پولیس کے مطابق ریلی کے روٹ کی اطراف کی تمام سڑکوں کو کنٹینرز لگا کر بند کیا گیا اور ٹریفک کے لئے متبادل راستے رکھے گئے۔

پولیس نے مزید بتایا کہ نمائش آنے والے ٹریفک کو سولجر بازار کی جانب موڑا گیا اور تبت سینٹر سے ٹریفک کو نیو ایم اے جناح روڈ اور لکی اسٹاربھیجنے کا پلان ہے۔ ریلی کے اختتام پر تمام روڈ کھول دیے جائیں گے۔