اگر آپ واٹس ایپ کے ڈیسک ٹاپ ورژن پر لاگ اِن کرنے کیلئے اب بھی کیو آڑ کوڈ کا استعمال کر رہے ہیں تو جان لیں کہ اب اس کی ضرورت نہیں رہی ہے، کیونکہ میسیجنگ ایپ نے ویب ورژن کیلئے ایک نیا فیچر متعارف کرا دیا ہے۔

واٹس ایپ کے مطابق اینڈرائیڈ ڈیوائسز کے لیے واٹس ایپ کے نئے بیٹا ورژن میں ایک نیا فیچر ”لِنک ود فون نمبر“ متعارف کرایا گیا ہے۔ جس کے ذریعے صارفین واٹس ایپ ویب پر کیو آر کوڈ اسکین کیے بغیر اپنے اکاؤنٹ کو استعمال کر سکیں گے۔

رپورٹ میں بتایا گیا ہے کہ یہ فیچر ابھی بیٹا ورژن میں محدود صارفین کیلئے دستیاب ہے جن میں پاکستانی بھی شامل ہیں، مگر مستقبل قریب میں اسے تمام صارفین کے لیے متعارف کرایا جائے گا۔

فیچر کیسے کام کرتا ہے؟

اس فیچر کو استعمال کرنے کے لیے پہلے براؤزر پر واٹس ایپ ویب کو اوپن کریں۔ وہاں دائیں جانب کیو آر کوڈ موجود ہوگا جبکہ بائیں جانب نیچے ”لنک ود فون نمبر“ کا آپشن ہوگا۔

اس آپشن پر کلک کرنے پر آپ سے فون نمبر پوچھا جائے گا۔ فون نمبر کے اندراج پر 8 ہندسوں کا کوڈ لکھا آئے گا جسے واٹس ایپ کی موبائل ایپ پر ”لنکڈ ڈیوائس“ کے آپشن میں جاکر درج کرنا ہوگا۔