لاہور کی انسداد دہشت گردی عدالت نے جناح ہاؤس پر حملے سمیت 5 مقدمات میں چیئرمین تحریک انصاف عمران خان کی عبوری ضمانت میں 8 اگست تک توسیع کر دی۔

انسداد دہشت گردی عدالت کی جج عبہر گل خان نے جناح ہاؤس حملہ سمیت 5 مقدمات کے کیس کی سماعت کی۔

سربراہ تحریک انصاف عمران خان اپنی عبوری ضمانت کی معیاد ختم ہونے پر انسداد دہشتگردی عدالت میں پیش ہوئے۔

دوران سماعت سپیشل پراسیکیوٹر فرہاد علی شاہ نے عدالت کو بتایا کہ پولیس نے چیئرمین پی ٹی آئی سے تفتیش مکمل کر لی ہے، سابق وزیراعظم تفتیش میں قصور وار پائے گئے ہیں۔

وکلاء کے دلائل سننے کے بعد عدالت نے چیئرمین پی ٹی آئی کی عبوری ضمانت میں 8 اگست تک توسیع کر دی اور وکلاء کو دلائل کے لیے آئندہ سماعت پر طلب کر لیا

چیئرمین پی ٹی آئی کے خلاف جناح ہاؤس، عسکری ٹاور اور شادمان پولیس اسٹیشن پر حملے کے الزام میں بھی مقدمات درج ہیں جبکہ عدالت نے ظل شاہ قتل اور ہنگامہ آرائی کے 2 مقدمات میں عبوری ضمانت پر فیصلہ محفوظ کر رکھا ہے۔

یاد رہے کہ 9 مئی کو چیئرمین تحریک انصاف کی گرفتاری پر ملک گیر پُرتشدد احتجاج کیا گیا تھا، جس میں قومی املاک کو نقصان پہنچایا گیا تھا جس میں فوج کی تنصیبات بھی شامل ہیں۔

فوجی تنصیبات سمیت مختلف مقامات پر حملوں اور جلاؤ گھیراؤ کے بعد چیئرمین پی ٹی آئی اور دیگر رہنماؤں و کارکنوں کے خلاف مقدمات درج کئے گئے تھے۔

عدالت نے ظل شاہ قتل اور ہنگامہ آرائی کے دو مقدمات میں بھی ضمانت کی درخواستوں میں محفوظ فیصلے کی تاریخ میں بھی توسیع کر دی، عمران خان کی پیشی کے موقع پر پولیس کی بھاری نفری تعینات کی گئی تھی۔