یوم آزادی کے موقع پر واہگہ بارڈر پر قومی پرچم اتارنے کی پُرجوش تقریب کا انعقاد کیا گیا، ہزاروں شہروں نے ہاتھوں میں پرچم تھامے فورسز کا حوصلہ بڑھایا۔

چودہ اگست کی مناسبت سے خصوصی پریڈ منعقد کی گئی۔ کور کمانڈر لاہور لیفٹیننٹ جنرل سید عامر رضا آج کی خصوصی پریڈ کے مہمان خصوصی تھے۔

واہگہ بارڈر پر پرچم اتارنے کی پر وقار تقریب میں ہزاروں پاکستانیوں نے شرکت کی۔

شرکا نے ہاتھوں میں قومی پرچم اٹھا رکھے تھے، اس موقع پر پاکستان اور سکیورٹی فورسز کے حق میں پُرجوش افراد نے فلک شگاف نعرے بھی لگائے۔

پاکستان رینجرز کے شیر دل جوانوں کے بوٹوں کی گھن گھرج اور وطن کی حفاظت کے جذبے سے بھرپور پریڈ نے پاکستانیوں کا لہو خوب گرمایا۔

واہگہ بارڈر پر موجود بچے، بزرگ، خواتین سب ہی بہت پُرجوش نظر آئے اور بھرپور انداز میں اپنے سپاہیوں کا حوصلہ بڑھاتے رہے۔

واہگہ بارڈر پر یوم آزادی کی تقریب کے دوران قومی ترانہ بجایا گیا۔ اس موقع پر فورسز کے اہلکاروں اور شرکاء نے ملی جوش و جذبے کے ساتھ ترانہ سنا ۔

یاد رہے کہ دو روز قبل واہگہ بارڈر پر پرچم اتارنے کی تقریب کے دوران بھارتی سپاہی بندوق نہ سنبھال سکا تھا۔

تقریب کے دوران بھارت کی بارڈر سیکیورٹی فورس (بی ایس ایف) اہلکار کی بندوق گر گئی تھی۔