انگلش ٹیم کے سابق کپتان مائیکل وان نے 2024 کا ٹی 20 ورلڈکپ پاکستان کے جیتنے کی پیشگوئی کردی۔

سوشل میڈیا پر کلب پریری فائر کے اکاؤنٹ پر سابق آسٹریلوی کرکٹر ایڈم گلکرسٹ اور دیگر کے ساتھ سابق انگلش کپتان مائیکل وان نے پاکستان کرکٹ کے حوالے سے گفتگو کی۔

کلب پریری فائر کے اکاؤنٹ پر پوسٹ کیا گیا کہ پاکستان کرکٹ کو اس وقت ’افراتفری‘ کا سامنا ہے، واضح طور پر 2024 پر اس ٹیم پر سب کی نظر ہوگی۔

جس پر جواب دیتے ہوئے سابق انگلش کپتان مائیکل وان نے پیشگوئی کہ ویسٹ انڈیز اور امریکا میں اگلے سال کھیلا جانے والا ٹی 20 ورلڈ کپ پاکستان جیتے گا۔

انہوں نے اس اعتماد کا اظہار کیا کہ حالیہ کارکردگی کے باوجود پاکستان ایک مضبوط ٹیم ہے اور ٹی 20 ورلڈ کپ جیتنے کی صلاحیت رکھتی ہے۔

مائیکل وان نے پاکستان کرکٹ بورڈ (پی سی بی) میں حالیہ تبدیلیوں کا بھی ذکر کرتے ہوئے محمد حفیظ ٹیم ڈائریکٹر اور وہاب ریاض کو چیف سلیکٹر کا عہدہ ملنے پر تنقید بھی کی۔

خیال رہے کہ سابق انگلش کرکٹر مائیکل وان پاکستانی کرکٹ ٹیم کے حوالے سے پیش گوئیاں کرتے رہتے ہیں۔

یاد رہے کہ پاکستان سال 2021 اور 2022 کے ٹی 20 ورلڈ کپ کے آخری دونوں ایڈیشنز کے ناک آؤٹ مرحلے تک کوالیفائی کرنے میں کامیاب رہا تھا جبکہ سال 2009 میں یونس کی قیادت میں پاکستان نے ٹائٹل اپنے نام کیا تھا۔

انگلینڈ کرکٹ ٹیم کے سابق کپتان مائیکل وان نے بابر اعظم کی آسٹریلیا کے خلاف 3 ٹیسٹ میچوں کی سیریز سے قبل تیاریوں کے حوالے سے ایک ویڈیو شیئر کی اور پیشگوئی کرتے ہوئے کہا کہ پاکستان کرکٹ ٹیم کے سابق کپتان اپنی تکنیک سے آسٹریلیا کے آئندہ دورے پر بہت زیادہ رنز بنائیں گے۔

واضح رہے کہ آئی سی سی ورلڈ ٹی 20 ورلڈ کپ اگلے سال جون میں ویسٹ انڈیز اور امریکا میں کھیلا جائے گا۔