آرمی چیف جنرل سید عاصم منیر سے رائل سعودی لینڈ فورسز کے کمانڈر نے ملاقات کی، جس میں مشرق وسطیٰ میں جاری تنازع پر تبادلہ خیال کیا گیا جبکہ پاک فوج کے سربراہ نے کہا کہ پاکستان سعودی عرب کے ساتھ اپنے اسٹریٹجک اور برادرانہ تعلقات کو خصوصی اہمیت دیتا ہے۔

پاک فوج کے شعبہ تعلقات عامہ (آئی ایس پی آر) کے مطابق رائل سعودی لینڈ فورسز کے کمانڈر لیفٹیننٹ جنرل فہد بن عبداللہ المطیرنے اپنے وفد کے ہمراہ جی ایچ کیو راولپنڈی کا دورہ کیا۔

جی ایچ کیو آمد پرپاک فوج کے چاق و چوبند دستے نے سعودی کمانڈرکوگارڈ آف آنرپیش کیا۔

سعودی کمانڈر نے آرمی چیف جنرل سید عاصم منیرسے ملاقات بھی کی، ملاقات کے دوران باہمی دلچسپی کے امور بشمول دفاع، سیکیورٹی اور فوجی تربیت کے شعبوں میں تعاون سمیت علاقائی صورتحال اور مشرق وسطیٰ میں جاری تنازعے پرتبادلہ خیال کیا گیا۔

رائل سعودی لینڈ فورسز کے کمانڈر لیفٹیننٹ جنرل فہد بن عبداللہ المطیر نے دہشت گردی کے خلاف جنگ میں پاک فوج کے کردار کو سراہا اور خطے میں امن قائم کرنے کے لیے دی گئی قربانیوں کو زبردست خراج تحسین پیش کیا جبکہ آرمی چیف نے معزز مہمان کا شکریہ ادا کیا۔

اس موقع پر آرمی چیف جنرل سید عاصم منیر نے کہا کہ پاکستان سعودی عرب کے ساتھ اپنے اسٹریٹجک اور برادرانہ تعلقات کو خصوصی اہمیت دیتا ہے۔

کثیر الملکی مشترکہ انسداد دہشت گردی فوجی مشقوں کا انعقاد

دوسری جانب نیشنل کاؤنٹر ٹیررازم سینٹر پبی میں کثیر الملکی مشترکہ انسداد دہشت گردی کی فوجی مشقوں کا انعقاد کیا گیا۔

پاک فوج کے شعبہ تعلقات عامہ (آئی ایس پی آر) کے مطابق نیشنل کاؤنٹر ٹیررازم سینٹر پبی میں کثیر القومی مشترکہ انسداد دہشت گردی کی مشقوں کا انعقاد کیا گیا۔

2 ہفتے پر محیط تربیتی مشقوں فجر الشرق پنجم میں برادر ممالک کی اسپیشل فورسز کے دستوں نے شرکت کی۔

فجر الشرق پنجم میں پاکستان، بحرین، عراق اور کویت کی اسپیشل فورسز نے انسداد دہشت گردی کے حوالے سے مختلف مشقیں کیں، ان مشقوں کا مقصد انسداد دہشت گردی کے مختلف پہلوئوں کے حوالے سے ایک دوسرے کے تجربات سے استفادہ کرنا اور باہمی تعاون کو فروغ دینا ہے۔

مشقوں کے درمیان شریک ممالک کے دستوں نے بھرپور جوش اور جذبے کا مظاہرہ کیا۔