Aaj News

خواجہ آصف نے متوقع وزیراعظم کا نام بتا دیا، مریم اورنگزیب کی تردید

وزارت اعلیٰ کا بھی ہمارے پارٹی نے فیصلہ کرلیا ہے، خواجہ آصف
شائع 12 فروری 2024 04:34pm

پاکستان مسلم لیگ (ن) کی ترجمان مریم اورنگزیب کا کہنا ہے کہ خواجہ آصف کا بیان سیاق وسباق سے ہٹ کر پیش کیا جارہا ہے، پارٹی واضح کرنا چاہتی ہے کہ وزیراعظم کے امیدوار کا نام ابھی طے نہیں ہوا۔

سوشل میڈیا پر جاری پیغام میں مریم اورنگزیب نے واضح کیا کہ اتحادیوں کے ساتھ سیاسی مشاورت پر وزیراعظم کا نام متفقہ طور پر طے ہوگا، اس ضمن میں ابھی کوئی حتمی فیصلہ نہیں ہوا۔

مریم اورنگزیب نے کہا کہ بات چیت اور رابطوں کا سلسلہ جاری ہے، جس کے بعد میڈیا کے ذریعے قوم کو اعتماد میں لیا جائے گا۔

مسلم لیگ (ن) کے سینئر رہنما خواجہ آصف نے بیان دیا تھا کہ اگلے دو تین دن میں مخلوط حکومت کی شکل نکل آئے گی، وزیراعظم کیلئے شہباز شریف ن لیگ کے امیدوار ہوں گے، شہبازشریف کو تجربہ بھی ہے اور وہ ایک بار وزیراعظم بھی رہ چکے ہیں۔

سابق وفاقی وزیر نے کہا تھا کہ کوئی اتحاد تشکیل دے دیا جائے گا تو اس کی طرف سے نام آئے گا، اتحاد پیپلز پارٹی کی طرف سے آنے والے نام پر بھی غور کرے گا، وزارتوں کا فیصلہ بھی اتحاد ہی کرے گا۔

ایک سوال پر ان کا کہنا تھا کہ وزارت اعلیٰ کا سوال مجھ سے نہ پوچھیں ابھی وزارت عظمیٰ پر رہیں، وزارت اعلیٰ کا بھی ہمارے پارٹی نے فیصلہ کرلیا ہے۔

خیال رہے کہ ذرائع کے مطابق پنجاب اور وفاق میں حکومت سازی کے معاملے پر ن لیگ، پیپلز پارٹی، ایم کیو ایم، جے یو آئی ف کے مابین سیاسی اتحاد پر اتفاق ہوگیا ہے۔

واضح رہے کہ نئی حکومت کی تشکیل کے حوالے سے مسلم لیگ ن اور پیپلز پارٹی کے درمیان رابطے جاری ہیں، گزشتہ روز بلاول بھٹو سے شہباز شریف نے بلاول ہاؤس میں ملاقات کی، ملاقات میں ملک کی مجموعی صورتحال اور مستقبل میں سیاسی تعاون پر تفصیلی بات چیت کی گئی۔

Marriyum Aurangzeb

Khuwaja Asif

PAKISTAN MUSLIM LEAGUE (PMLN)

Election 2024

GENERAL ELECTION 2024

election 2024 results

Next Prime Minister

Comments are closed on this story.

تبصرے

تبولا

Taboola ads will show in this div