وزیرآباد کی تحصیل علی پور چٹھہ کے نواحی گاؤں مدن چک میں کھیتوں سے ملنے والی لاش کا معمہ حل ہو گیا، مقتولہ نسرین کو اس کے شوہر نے غیرت کے نام پر قتل کیا۔ ملزم نےپولیس حراست میں قتل کااعتراف کرلیا۔

گزشتہ روز وزیرآباد کی تحصیل علی پور چٹھہ کے نواحی گاؤں میں کھیتوں سے محنت کش کی اہلیہ کی سر کٹی نعش برآمد ہوئی ہے، خاتون رفع حاجت کے لیے کھیتوں میں گئی، گھر والے سارا دن ڈھونڈتے رہے شام کو قریبی کھیتوں سے سر کٹی لاش ملی، جس کے بعد کہرام مچ گیا۔

پولیس نے معاملے کی چھان بین کی تو شوہر کی مشکوک حرکات پرپولیس نے ملزم کو حراست میں لیا ملزم نے پولیس حراست میں قتل کااعتراف کرلیا۔

مقتولہ کے شوہر محمد رمضان نے بتایا کہ مقتولہ نسرین کو غیرت کے نام پر قتل کیا ہے کیونکہ بیوی کئی کئی ماہ گھر سے غائب رہتی تھی۔

جبکہ مقتولہ نسرین کے بھائی ساجد کا کہنا تھا کہ بہنوئی نے بہن کو بدکرداری کا الزام لگا کر ناحق قتل کیا ہے۔

پولیس نے لاش کو تحویل میں لے کر پوسٹ مارٹم کے لیے وزیرآباد منتقل کر دیا ہے،مقتولہ پانچ بچوں کی ماں تھی۔