ایچی سن کالج میں وفاقی وزیر کے بچوں سے متعلق فیس معافی کا معاملے میں ایک طرف تحریک انصاف مذمتی بیانات جاری کر رہی ہے تو دوسری جانب انکشاف ہوا ہے کہ پاکستان تحریک انصاف کی پنجاب حکومت نے ہی فیس معافی کی حمایت کی تھی۔

سابق صوبائی وزیر ہائیر ایجوکیشن راجہ یاسر ہمایوں کی جانب سے فیس معافی پر مکمل حمایت کی گئی تھی۔

راجہ یاسر ہمایوں نے پی ٹی آئی پنجاب حکومت کا مؤقف دسمبر 2022 میں ہونے والی بورڈ میٹنگ میں رکھا تھا۔

دوسری جانب تحریک انصاف نے ملک کے صفِ اوّل کے تعلیمی ادارے کی تباہی کی کوششوں کی شدید مذمت کرتے ہوئے احد چیمہ، گورنر پنجاب اور وزیراعلیٰ سے جواب طلبی کا مطالبہ کیا ہے۔

پی ٹی آءی کے ترجمان کا کہنا ہے کہ اداروں کی تباہی شریف خاندان کا پرانا وطیرہ اور روایت ہے، پنجاب میں اقتدار پر قابض وزیراعلیٰ کی ذاتی زندگی میرٹ چوری، جھوٹ اور کرپشن سے عبارت ہے۔

ترجمان پی ٹی آئی نے کہا کہ ایچی سن کالج کے پرنسپل کا استعفیٰ جاتی امراء کے مجرموں حکمرانی کا خلاصہ ہے، والدین اور شہری تعلیم اور تعلیمی اداروں کی تباہی پر سراپا احتجاج ہیں، اس معاملے کی مکمل اور جامع تحقیقات کی جائیں۔