Aaj News

بدھ, جولائ 17, 2024  
10 Muharram 1446  

سینیٹر کے خود کو تھپڑ، ’سانس لینے، موت، شادی اور بچے پیدا کرنے پر بھی ٹیکس لگا دیں‘

سینیٹ میں ایم کیوایم ٹو کون سی جماعت ہے ؟
شائع 13 جون 2024 06:13pm

حکومت کی جانب سے پیش کئے جانے والے بجٹ میں ٹیکسز کی بھرمار پر سینیٹ اجلاس میں کرما گرمی دیکھی گئی ، سینیٹرز نے غم و غصہ کا اظہار بھی کیا۔

چیئرمین سینیٹ سید یوسف رضاگیلانی کی زیر صدارت سینیٹ کا اجلاس جاری ہے۔

شبلی فراز نے بجٹ پر بحث کا آغاز

اپوزیشن لیڈر شبلی فراز نے بجٹ پر بحث کا آغاز کرتے ہوئے کہا کہ وزیرخزانہ کا اس حکومت میں آنے کا سب سے غلط فیصلہ تھا، پاکستان تحریک انصاف اس بجٹ کو زہر قاتل سمجھتی ہے، تنخواہ دار طبقے پر مزید ٹیکس لگا دیے گئے، نچلے طبقے کے ملازمین کا جینا محال ہوگیا۔

اپوزیشن لیڈر نے مزید کہا کہ ایسے سیکٹرز پر ٹیکس لگایا گیا جس سے ہماری اکانومی مزید نیچے جائے گی، ہماری قرضوں اور سود کی ادائیگی آمدن کا 75فیصد ہوگئی ہے۔

انہوں نے کہا کہ، کل پیپلزپارٹی نے کہا ہم بجٹ اجلاس میں شرکت نہیں کریں گے پھر تھوڑی دیر بعد شامل ہوگئے، پیپلزپارٹی نظریاتی پارٹی کی بجائے مفاداتی پارٹی بن گئی ہے، آپ لوگ ایم کیوایم ٹو بننے جارہے ہیں۔

گزشتہ دو سال میں مزید دو کروڑ افراد خط غربت سے نیچے چلے گئے، ہمارے وقت میں 44.3کھرب کا قرضہ تھا، آج 67.5کھرب تک پہنچ گیا ہے، ہمارا سفر نیچے کی جانب گامزن ہے جو اس وقت رکے گا جب اشرافیہ اپنے کاروبار اور اثاثے ملک میں رکھے گی۔

سینیٹر عبدالشکور نے اپنے منہ پر تھپڑ مار دیا

جبکہ سینیٹر عبدالشکور نے سینیٹ میں اظہار خیال کرتے ہوئے کہا کہ آج ایک ہندو رکن نے سود کے خلاف اللہ کا حکم سنایا، اللہ کے حکم کی عدولی نہ کرنے ہر میں خود کو علامتی تھپڑ مارتا ہوں۔

سینیٹر عبدالشکور نے اپنے منہ پر تھپڑ مار دیا۔

سینیٹر عرفان صدیقی کا اظہار خیال

سینیٹر عرفان صدیقی نے اظہار خیال کیا کہ شبلی فراز کے ہاں قانونی حکومت وہ ہوتی ہے جو ان کی اپنی ہوتی ہے، اس کے علاوہ باقی حکومتیں غیرقانونی ہوتی ہیں،، اکہتر برس میں جتنا قرضہ اس ملک نے لیا اتنا ہی آپ نے چار سالوں میں لیا گیا ہے، ہم نے آئی ایم ایف کو بائے بائے کہہ دیا تھا آپ کی وجہ سے پھر آئی ایم ایف کے پاس جانا پڑا، آئی ایم ایف کے دروازے پر آپ نعرے لگاؤ گے کہ ان کو پیسے نا دو تو یہ کیا ہوگا۔

سینیٹر سیف اللہ ابڑو کا سینٹ میں خطاب

سینیٹر سیف اللہ ابڑو نے اظہار خیال کرتے ہوئے کہا کہ ایف بی آر کے چیئرمین کو ہٹائیں، جس ادارے نے ٹیکسز جمع کرنے ہیں اس کا سربراہ ہی غلط بیٹھا ہے۔

ایمل ولی خان ٹیکس لگائے پر برس پڑے

ایمل ولی خان کا کہنا تھا کہ حالیہ بجٹ میں اتنے زیادہ ٹیکس لگائے گئے ہیں، اب نوبت آگئی ہے کہ سانس لینے، موت پر اور شادی اور بچے پیدا کرنے پر بھی ٹیکس لگا دیں۔

ایمل ولی نے مطالبہ کیا کہ تمام اسمبلیوں اور سینیٹ کی ساری مراعات ختم کی جائیں تاکہ عکاسی ہو ہم قرض دار ہیں، ہمارے صدر، وزیر اعظم اور وزراء کو بھی مراعات کی ضرورت نہیں، سترہ گریڈ سے اوپر افسران کے مزے ہیں۔

انہوں نے کہا کہ دفاعی اداروں کا کمرشل جائیداد سے کیا کام، رولنگ دیں کہ دفاعی اداروں کی جائیدادوں کا رقبہ اور مالیت بتائی جائے، اس کا تخمینہ لگا کر نجکاری کی جائے تو ملک کا پورا قرضہ اتر سکتا ہے، ریٹائر ہونے والے بریگیڈر اور اس سے اوپر کے افسران کو بارانی زمین کس آئین کے تحت مل رہی ہے؟

ایمل ولی کا مزید کہنا تھا کہ نے بیرون ملک پناہ لینے والے پاکستانیوں کے پاسپورٹ ختم کرنے کے فیصلہ پر نکتہ چینی کرتے ہوئے کہا کہ میری پھوپھی پر حملہ ہوا ، انھوں نے امریکہ میں پناہ لی ، کیا انھیں یہ تحفہ دیا جارہا ہے کہ ان کا پاسپورٹ ختم کیا جائے، وہ خوشی سے ملک سے باہر نہیں گئیں، میں پاسپورٹ منسوخی کے فیصلے پر شدید احتجاج کرتا ہوں، اس پالیسی کو واپس لیا جائے۔

بجٹ میں کچھ نہیں رکھا گیا، سینیٹر جان محمد

نیشنل پارٹی کے سینیٹر جان محمد نے اظہار خیال کیا کہ اس بجٹ میں کوئی خوشحالی اور بحالی ، عوام کو ریلیف دینے کا منصوبہ نہیں، زرعی شعبے کےلئے بجٹ میں کچھ نہیں رکھا گیا۔

تاج حیدر کا اظہار خیال

تاج حیدر نے کہا کہ بجٹ دستاویز میں صرف ناکام پالیسی کو اپنایا گیا ہے، بجٹ دستاویز صرف آئی ایم ایف کے گن گا رہی ہے، خوشی منائی جا رہی ہے کہ آئی ایم ایف ہم سے راضی ہے، افسوس ہے آج اسمگلر ملک کی پالیسی بنا رہے ہیں، شرح سود نے ملک کو مشکل میں ڈال دیا ہے، این ایف سی کے متوازی ایوارڈ بنایا جا رہا ہے، جو آئین کی خلاف ورزی ہے، بجٹ بناتے ہوئے آئین کو نہ توڑا جائے۔

دوست محمد خان نے بجٹ کو تباہی والا بجٹ قرار دیا

سینیٹر دوست محمد خان نے بجٹ کو تباہی والا بجٹ قرار دے دیا کہا کہ ہر روز اس سے بدحالی آئے گی، یہ آئی ایم ایف کا بجٹ ہے، وزیرخزانہ کو چاہیے تھا جاکر یہ بجٹ آئی ایم ایف کو پیش کرتے، فاٹا اور پاٹا پر ٹیکس لگایا جانا ڈرون حملے کے مترادف ہوگا۔

سینیٹر طاہر خلیل کا اظہار خیال

سینیٹر طاہر خلیل نے کہا کہ بڑے بڑے کاروباری افراد ٹیکس نہیں دیتے، ٹیکس نیٹ ورک میں سب کو لانا پڑے گا۔

سینیٹر عون عباس کا اظہار خیال

سینیٹر عون عباس نے اظہار خیال کیا کہ پیپلزپارٹی اس وقت منافقت کررہی ہے جب فنانس کمیٹی کی سربراہی پیپلزپارٹی کے پاس ہے، بجٹ میں پیپلزپارٹی مکمل طور پر ساتھ ہے، جب اوپر سے حکم ہوا تو ساری پیپلزپارٹی ایوان میں ہاتھ باندھ کر آگئی، ٹیکسز کا سارا بوجھ انہوں نے تنخواہ دار طبقے پر ڈال دیا۔

انہوں نے کہا کہ جس شخص کی ایک لاکھ روپے تنخواہ تھی وہ سال میں ایک لاکھ پندرہ ہزار دیتا تھا، اب اس پر دو لاکھ دس ہزار سالانہ ٹیکس بڑھا دیا ہے، بالواسطہ ٹیکس ساڑھے سات ہزار ارب کردیا گیا ہے، سرکاری ملازمین کی بیس فیصد تنخواہ بڑھائی ہے وہ بوجھ ہے، نجی شعبے میں لوگ تنخواہیں نہیں بڑھائیں گے لیکن ان کا ٹیکس بڑھا دیا ہے، زیرخزانہ بتائیں چار ماہ پہلے ان کی کس ملک کی شہریت تھی، ہالینڈ کے شہری کو کیا پتہ کامونکی میں کیا مسائل ہیں، امپورٹڈ فنانس منسٹر کو کیا پتہ ہے۔ سود تو اللہ سے جنگ ہے، ہم کیوں لے رہے ہیں۔

سینیٹر دنیش کمار کا خطاب

سینیٹر دنیش کمار نے کہا کہ میں حلفا کہتا ہوں میں ان کتابوں کا ایک فیصد بھی نہیں پڑھتا، اس ایوان میں سب جھوٹ ہے، کوئی وزیر نہیں، کوئی حکومتی رکن نہیں، یہ ہمارے لئے شرم کا مقام ہے، ہم عوام کے پیسوں کو لوٹ رہے ہیں۔

دینیش کمار کا کہنا تھا کہ خسارے پر خسارے ہے، قرضہ لیکر خسارہ پورا کررہے ہیں، وفاق سود پر صوبوں کو پیسے دے رہا ہے، اسلامی تعلیمات میں سود تو اللہ سے جنگ ہے، ہم کیوں دے اور لے رہے ہیں، بحیثیت غیرمسلم مجھے شرم آتی ہے کہ ہم منافقت کررہے ہیں، ہم تجاویز دیں گے تو ایک بھی تجویز پر عمل نہیں ہوگا اگر ہوا تو ایک سال ایوان میں نہیں آؤں گا۔

Senate of Pakistan