پاکستانی دفتر خارجہ نے الداخلہ کے قریب مراکش کشتی حادثے میں زندہ بچ جانے والے 21 پاکستانیوں کی فہرست جاری کردی، ترجمان دفتر خارجہ شفقت علی خان کاکہنا ہے کہ حکومت اوورسیز پاکستانیوں کی فلاح کے لیے پرعزم ہے۔

ترجمان دفتر خارجہ نے اپنے بیان میں بتایا کہ مصدقہ اطلاعات کے مطابق میری ٹائم کے ریسکیو آپریشن میں 21 پاکستانی بھی شامل ہیں۔

بیان کے مطابق رباط میں پاکستانی سفارتخانے کے ذریعے متاثرہ افراد کو فوری رسپانس دیا گیا ہے۔

ترجمان کے مطابق پاکستانی سفارتخانے نے ابتدائی ضروریات تمام متاثرین کو مہیا کر دی ہیں جس میں کھانا، پانی، ادویات اور کپڑے شامل ہیں جبکہ میڈیکل ٹیمیں بھی ریلیف آپریشن میں شامل ہیں۔

ترجمان کے مطابق آپریشن کی مزید نگرانی کے لیے پاکستانی سفارتخانہ اور حکومت پاکستان مراکش حکام کے ساتھ رابطے میں ہیں اور تمام صورتحال کا جائزہ لیا جا رہا ہے۔

دفتر خارجہ کی جانب سے جاری فہرست میں مدثر حسین، وسیم خالد، محمد خالق، عبدالغفار، گل شامیر، تنویر احمد، محمد عباس کاظمی، غلام مصطفیٰ، عمران اقبال، شعیب زعفر، علی حسن، محمد عاصف اور بلال اقبال کے نام شامل ہیں۔

ترجمان دفترخارجہ کا کہنا ہے کہ یہ باقاعدہ تصدیق شدہ فہرست ہے، متاثرہ پاکستانیوں کی واپسی کے انتظامات کیے جارہے ہیں، اہل خانہ اپنے پیاروں کی خیریت جاننے کے لیے 00212689522365 اور 00923102204672 پر رابطہ کر سکتے ہیں۔