بھارتی تربیت یافتہ دہشت گرد تنظیم مکتی باہنی کے سابق کمانڈرنے مشرقی پاکستان کی علیحدگی کو بڑی غلطی مان لیا۔

74 سالہ زین العابدین نے جو امریکی شہر پنسلونیا میں مقیم ہیں ،یوٹیوب چینل وائٹ نیوز بنگلہ سے انٹرویو میں کہا کہ 1971ء نے جنوبی ایشیا کی تاریخ کا رخ بدل دیا تھا۔

کمانڈر نے دکھ کا اظہار کرتے ہوئے کہا ہمیں اپنے ہی ملک اور اپنے ہی بھائیوں کے خلاف لڑنے پر مجبور کیا گیا۔ ہم نے کبھی نہیں سوچا تھا ہمارے آباؤ اجداد کی بے مثال قربانیوں اور جدوجہدکے بعد حاصل ہونیوالا ملک ہمیں لڑتے دیکھے گا۔

انھوں نے انکشاف کیا مکتی باہنی کے کارندوں کو بھارت میں مسلح تربیت دی گئی اور وہ بے گناہوں کے قتل عام میں ملوث ہے۔

زین العابدین نے سابق وزیر اعظم شیخ حسینہ کی بے دخلی، فرار اور بھارت میں قیام کے متعلق کہا وہ وہاں نظر بند اورحکومتی کنٹرول میں ہے، بھارت اسے رہا نہیں کرے گا کیونکہ وہ ظاہر کر دے گی کہ اسے بنگلا دیش پر قبضے کیلئے استعمال کیا گیا۔

سابق کمانڈر نے انکشاف کیا بطور مصنف دنیا کے سامنے ”بھارت کا بدصورت چہرہ“ بے نقاب کر رہا ہوں، وہ ایک دن ضرور ٹکڑے ٹکڑے ہو گا۔

1995میں مصنفین کی کانفرنس کے لیے اپنے پاکستان کے دورے کو یاد کرتے ہوئے، زین العابدین نے ایک دل دہلا دینے والا تجربہ بیان کیا۔ انہوں نے بتایا کہ وہ پاکستان میں جن لوگوں سے ملے انہوں نے انہیں گلے لگایا اوراپنا بنگلا دیشی بھائی قراردیا۔ میں نے انہیں بتایا کہ میں مکتی باہنی کا رکن ہوں۔

انہوں نے کہا ’تو کیا ہوا؟ تم ہمارے بھائی ہو۔ یہ پاکستانی مسلمانوں کا جذبہ ہے۔ ان لوگوں نے بنگلا دیش کے خلاف نفرت کو ختم کر دیا ہے ۔انہوں نے واضح کیا کہ بت پرست ہندوستانیوں سے ہمارا کوئی تعلق نہیں ہے۔ بنگلا دیش اور پاکستان کے تمام لوگ ایک جیسے جذبات رکھتے ہیں۔