پاکستان پیپلزپارٹی کے چیئرمین بلاول بھٹو زرداری اور اپوزیشن لیڈر شہباز شریف کے درمیان ٹیلی فونک رابطہ ہوا جس میں ملکی سیاسی صورتحال سمیت مسئلہ کشمیر کے حوالے سے تبادلہ خیال کیا گیا۔

چیئرمین بلاول بھٹو زرداری نے شہباز شریف کو عیدالاضحیٰ کی مبارک باد دی تاہم دونوں رہنماوں کے درمیان ملکی سیاسی صورت حال پر بھی بات چیت سمیت مسئلہ کشمیر کے معاملے میں حکومتی ناکامیوں پر تشویش کا اظہار کیا گیا۔

اس موقع پرچیئرمیں بلاول بھٹو نےکہا بھارت کشمیریوں پر ظلم کررہا ہے اور عمران خان کلبھوشن یادیو کو ریلیف پہنچانے کی کوشش کررہے ہیں۔ ملکی تاریخ میں اتنی کرپشن نہیں ہوئی، جتنی عمران خان کے دورِحکومت میں ہورہی ہے جبکہ مہنگائی نے عوام کا جینا مشکل کردیا ہے۔

بلاول بھٹو کا مزید کہنا تھا کہ اے پی سی میں اہم تاریخی فیصلے مستقبل پر اہم اثرات مرتب کریں گےجس پر اپوزیشن لیڈر میاں شہباز شریف نے اتفاق رائے کا اظہار کیا۔