لاہور :احتساب عدالت میں رمضان شوگر ملزاور آشیانہ اقبال ریفرنس پر سماعت آج ہوگی،اپوزیشن لیڈر میاں شہباز شریف پر رمضان شوگر ملز ریفرنس میں فرد جرم عائد کئے جانے کا امکان ہے۔

لاہور کی احتساب عدالت میں رمضان شوگر ملزاور آشیانہ اقبال ریفرنس پر سماعت آج ہوگی۔

احتساب عدالت کے جج امجد نذیرچوہدری پاکستان مسلم لیگ نون کے صدر شہباز شریف، فواد حسن فواد اوراحد چیمہ سمیت ملزمان کے خلاف آشیانہ اقبال ریفرنس پر سماعت کریں گے۔

عدالت نے پنجاب لینڈ ڈویلپمنٹ کمپنی سے تعلق رکھنے والے گواہان کو بھی آج طلب کر رکھا ہے،ملزمان پر ملی بھگت کر کے ٹھیکے من پسند افراد کو دینے کا الزام ہے۔

دوسری جانب احتساب عدالت نے رمضان شوگر ملز ریفرنس میں میاں شہباز شریف کو فرد جرم عائد کرنے کیلئے بھی طلب کر رکھا ہے۔

عدالت نے اپوزیشن لیڈر شہباز شریف کو سماعت پر ہر صورت پیش ہونے کا حکم دیا تھا،گزشتہ سماعت پر درخواستگراز کے وکیل نے شہباز شریف کی عدالت میں پیش ہونے کی یقین دہانی کروائی تھی۔

رمضان شوگر مل کیس میں حمزہ شہباز بھی ملزم ہیں جو جوڈیشل ریمانڈ پر جیل میں ہیں ۔