فرانس سے سفارتی تعلقات منقطع کرنےکا معاملہ کابینہ کے سامنے رکھنے کا حکم
اسلام آباد ہائیکورٹ نے گستاخانہ خاکوں کی اشاعت سے متعلق فرانس سے سفارتی تعلقات منقطع کرنے کی درخواست پر معاملہ وفاقی کابینہ کے سامنے رکھنے کا حکم دے دیا۔
اسلام آبادہائیکورٹ کے جسٹس محسن اختر کیانی نے فرانس سے سفارتی تعلقات منقطع کرنے کی درخواست پر سماعت کی۔
درخواست گزار شہدا فاونڈیشن کے وکیل طارق اسد نے مؤقف اپنایا کہ فرانس کے خاکے شائع کرنے پر ترکی قطر مسلم ممالک نے احتجاج کیا ہے، سب سے بڑی بات یہ ہے کہ فرانسیسی صدر نے خود دو عمارتوں پر خاکے لٹکانے کا کہا۔
جسٹس محسن اختر کیانی نے ریمارکس دیئے کہ پاکستان کی حکومت نے مذمت کی اور فرانسیسی سفیر کو بھی بلایا ہے،قومی اسمبلی سے قرارداد بھی پاس ہوئی ہے،پارلیمنٹ سے قرارداد کا آنا بھی عوام کی ترجمانی ہے۔
اسلام آباد ہائیکورٹ نے معاملہ وفاقی کابینہ کے سامنے رکھنے کا حکم دیتے ہوئے معاملہ نمٹا دیا۔
عدالت نے کہا کہ وفاقی کابینہ عوامی جذبات کو سامنے رکھ کر فیصلہ کرے۔
Comments are closed on this story.