Aaj TV News

BR100 4,979 Decreased By ▼ -47 (-0.94%)
BR30 24,460 Decreased By ▼ -313 (-1.26%)
KSE100 46,636 Decreased By ▼ -284 (-0.61%)
KSE30 18,480 Decreased By ▼ -178 (-0.95%)
COVID-19 TOTAL DAILY
CASES 1,218,749 2,928
DEATHS 27,072 68
Sindh 448,658 Cases
Punjab 419,423 Cases
Balochistan 32,707 Cases
Islamabad 103,720 Cases
KP 170,391 Cases

اسلام آباد:وفاقی کابینہ نے ارکان پارلیمنٹ کی تنخواہوں میں اضافے کی سمری مسترد کردی۔

منگل کو وزیر اعظم عمران خان کی زیرصدارت وفاقی کابینہ کا اجلاس ہوا جس میں 14 نکاتی ایجنڈا پر غور کیا گیااور ملکی سیاسی ومعاشی صورتحال کا جائزہ لیا گیا۔

اجلاس کے دوران 20 ریگولیٹری اتھارٹیز کے چیئرمین اور ارکان کے معاوضوں پر رپورٹ پیش کی گئی۔

کابینہ اجلاس میں نئی رویت ہلال کمیٹی کیلئے قانون سازی، ہیوی کمرشل گاڑیوں پر ایڈیشنل کسٹم ڈیوٹیز میں کمی، پینل سرچارج کا خاتمہ، ایف بی آر ڈیٹا پر سائبر حملے کے تناظر میں آپریشنل ایمرجنسی کے نفاذ اور دیامر بھاشا ڈیویلپمنٹ کمپنی کے بورڈ آف ڈائریکٹرز کی تشکیل نو کی منظوری کا معاملہ بھی زیر غور آیا۔

ذرائع کا کہنا ہے کہ اجلاس کے دوران وفاقی کابینہ نے ارکان پارلیمنٹ کی تنخواہوں میں اضافے کی سمری مسترد کردی۔

وزارت پارلیمانی امور کی جانب سے ارکان پارلیمنٹ کی تنخواہوں میں اضافے کی سمری بھجوائی گئی تھی جس میں اراکین کے ایڈہاک الاؤنس میں 10فیصد اضافے کی تجویز پیش کی گئی تھی ۔

اجلاس میں اسپیکر، ڈپٹی اسپیکرقومی اسمبلی ، چیئرمین اور ڈپٹی چیئرمین سینیٹ کی تنخواہوں میں اضافے کی تجویزکو بھی مسترد کردیا گیا۔

وزیراطلاعات فواد چوہدری کی کابینہ اجلاس کے بعد میڈیا کو بریفنگ

کابینہ اجلاس کے بعد میڈیا کو بریفنگ دیتے ہوئے وفاقی وزیر اطلاعات ونشریات فواد چوہدری کا کہنا تھا کہ وزیراعظم کی زیر صدارت وفاقی کابینہ اجلاس میں آج مختلف معاملات پر گفتگو کی گئی اور مختلف محکموں کی کارکردگی پر بریفنگ دی گئی۔

وزیر اطلاعات کا کہنا تھا کہ کابینہ کواسپیکٹرم کی فروخت سے متعلق آگاہی دی گئی،پاکستان میں جلد ہی فائیو جی انٹرنیٹ سروس ٹیکنالوجی کا آغاز کردیا جائے گا،ا سپیکٹرم کی نیلامی میں ایک ٹیلی کام کمپنی نے حصہ لیا ہے،کابینہ نے پی ٹی اے کو ہدایت کی ہے کہ ٹیلی کام کے سیکٹر میں بہتری لائی جائے۔

فواد چوہدری کا کہنا تھا کہ الیکٹرانک ووٹنگ مشین اور بیرون ملک مقیم پاکستانیوں کو ووٹ کے حق سے متعلق پیش رفت کی گئی ہے،کریمنل نظام میں اصلاحات کے نئے نظام کو متعارف کرایا گیا ہے، اس سلسلے میں وزارت قانون نے کابینہ کو تفصیلی بریفنگ دی ہے۔

وفاقی وزیرفواد چوہدری کا مزیدکہنا تھا کہ ان اصلاحات کی وجہ سے کریمنل جسٹس سسٹم کا نظام تبدیل ہو جائے گا،وزیر قانون فروغ نسیم نے کابینہ کو کریمنل لا ریفارم کے حوالے سے تفصیلی بریفنگ دی،کابینہ کمیٹی برائے قانون میں یہ معاملہ ڈسکس ہوگا جسے بعد میں نافذ کر دیا جائے گا۔

وزیر اطلاعات فواد چوہدری نے کہا کہ کریمنل لا اصلاحات بہت زیادہ اہمیت رکھتی ہیں، ملک میں انصاف کے نظام کو بہتر کرنا وزیراعظم کا وژن ہے۔

فواد چوہدری نے وفاقی کابینہ کے اجلاس میں کئے گئے اہم فیصلے سے میڈیا کو آگاہ کرتے ہوئے کہا کہ ارکان پارلیمنٹ کی تنخواہوں میں 10 فیصد اضافے کی سمری مسترد کر دی گئی ہے،ارکان پارلیمنٹ کو10فیصد ایڈہاک الاؤنس نہیں ملےگا ،تنخواہوں میں اضافہ نہ کرنے کا فیصلہ کفایت شعاری مہم کاحصہ ہے ، ایف بی آر کا ڈیٹا ہیک کیاگیا، زیادہ ترڈیٹامحفوظ رہا۔