سینئر اداکار ایوب کھوسہ نے بلوچستان میں سیلاب سے متاثر ہونے والے عوام کی مدد کی اپیل کردی۔

ایوب کھوسہ نے اپنے ٹوئٹر ہینڈل سے ایک ویڈیو پیغام شیئر کیا ہے جس میں انہوں نے بتایا کہ وہ بلوچستان کے ڈسٹرکٹ لسبیلہ میں موجود ہیں جہاں پانی کے بےحد بہاؤ کی وجہ سے کوئٹہ کراچی کا زمینی راستہ بند ہو گیا ہے انہوں نے کہا کہ انٹرنیٹ اور بجلی نہ ہونے کی وجہ سے کوئٹہ کا پاکستان سے رابطہ بھی منقطع ہو گیا ہے۔

اداکار نے بتایا کہ بلوچستان کے تمام ڈسٹرکٹ بےحد خراب صورتحال کا شکار ہیں اور لوگوں کو شدید پریشانی کا سامنا ہے۔

ایوب کھوسہ نے کہا کہ لوگوں کی زندگی بہت مشکل میں ہے میں آپ سے اپیل کرتا ہوں کہ خدا کے واسطے آگے بڑھیں لوگوں کے گھر واپس بنانے اور مال مویشی لوٹانے میں ان کی مدد کریں۔

اداکار نے اپیل کی کہ بلوچستان کے لوگوں کو کھانا پینا پہنچائیں آپ سیلاب زدگان کی زندگی آسان بنائیں اللہ آپ کی زندگی آسان بنائے گا۔

دوسری جانب گلوکارہ حدیقہ کیانی نے انسٹاگرام پر ایک ویڈیو شیئر کی، جس میں انہوں نے بلوچستان میں سیلاب سے متاثرہونے والے لوگوں کے لیے امداد کی درخواست کی۔

واضح رہے کہ بلوچستان میں حالیہ بارشوں کے بعد سیلاب نے تباہی مچادی ہے، جبکہ ندی نالوں میں طغیانی، رابطہ سڑکیں بہہ جانے اور پل ٹوٹنے کے باعث بلوچستان کا ملک کے دیگر تمام صوبوں سے زمینی رابطہ منقطع ہو گیا ہے۔

پی ڈی ایم اے کی جانب سے جاری کردہ رپورٹ کے مطابق صوبے میں 250 سے زائد افراد انتقال کر چکے ہیں جبکہ ہزاروں افراد بےگھر ہو چکے ہیں اس علاوہ فصلیں، سولر پلیٹس، ٹیوب ویلز اور بورنگ کو بھی نقصان پہنچا ہے۔