زائرہ وسیم اور ثنا خان کے بعد ایک اور بھارتی اداکارہ نے اسلام کی خاطر فلم انڈسٹری چھوڑنے کا اعلان کردیا ہے۔

بھوج پوری فلم انڈسٹری کی معروف اداکارہ سحر افشاں نے اداکاری کی دنیا کو ہمیشہ کے لیے الوداع کہہ دیا ہے، سحر نے خود شوبز چھوڑنے کا اعلان اپنے انسٹاگرام پوسٹ کے ذریعے کیا۔

سحر افشاں نے لکھا ہے کہ آپ سب کو مطلع کرنا چاہتی ہوں کہ میں نے یہ طے کیا ہے کہ میں شوبز ( فلم انڈسٹری) کو چھوڑنے جارہی ہوں اور اب اس سے میرا کوئی تعلق نہیں ہوگا۔

انہوں نے بتایا کہ انشا اللہ میں آئندہ زندگی اسلامی تعلیمات اور اللہ کے احکامات کے مطابق گزارنے کا ارادہ رکھتی ہوں، اپنی گزشتہ زندگی سے توبہ کرتی ہوں اور اللہ سے معافی کی طلبگار ہوں۔

سحر افشاں نے لکھا ہے کہ فلموں میں کام کے دوران مجھے بہت زیادہ شہرت و دولت بھی ملی، لیکن ہمیشہ ایک خلش میں بھی مبتلا رہی کیونکہ ایسی زندگی کا میں نے کبھی بچپن میں بھی تصور نہیں کیا تھا، بس اتفاقا ہی اس فیلڈ میں آئی اور آگے ہی بڑھتی گئی لیکن اب یہ سب کچھ ختم کرنے کا ارادہ کرلیا ہے ۔

ان کا مزید کہنا تھا کہ آپ سب سے دعا کی درخواست ہے کہ اللہ مجھے استقامت اور نیکی والی زندگی عطا فرمائے۔ امید کرتی ہوں کہ مجھے میری پچھلی زندگی سے نہیں بلکہ آنے والی زندگی سے یاد رکھا جائے گا۔