ملک میں 24 اکتوبر سے شروع ہونے والی انسداد پولیو مہم اختتام پذیر ہوگئی ہے ملک بھر کے 83 اضلاع میں 2 کروڑ 50 لاکھ سے زائد 5 سال تک کے بچوں کو قطرے پلائے گئے۔

ترجمان وزارت صحت کے مطابق 24 اکتوبر سے شروع ہونے والی انسداد پولیو مہم کے دوران 83 اضلاع میں 25 ملین سے زیادہ بچوں کو حفاظتی قطرے پلائے گئے۔

سندھ کے21 ، پنجاب کے 14، خیبرپختونخوا کے 28، بلوچستان کے 18 اضلاع اور اسلام آباد کے دو اضلاع شامل ہیں جن میں بچوں کو قطرے پلائے گئے۔

وفاقی وزیرعبدالقادر پٹیل فرنٹ لائن ورکرز کو بہترین کارکردگی پر خراج تحسین پیش کرتے ہوئے کہا کہ آئندہ قومی سطح کی پولیو مہم کا انعقاد 21 نومبر سے کیا جا رہا ہے۔

انہوں نے کہا کہ بچوں کو پولیو کے دوقطرے پلا کر عمر بھر کی معذوری سے بچایا جاسکتا ہے، پولیو وائرس کی ملک بھر کے 11 اضلاع کے ماحولیاتی نمونوں میں تصدیق ہوئی ہے۔